پولیس کے مطابق دریا گنج میں گھنٹوں سے جمع ہجوم شام کو تشدد پر آمادہ ہو گیا۔ پولیس نے لوگوں کو منتشر کرنے کے لئے پانی کی بوچھاریں کیں لیکن بڑی تعداد میں لوگ اب بھی دریا گنج میں جمع ہیں۔ اس کے علاوہ جامع مسجد کے باہر اور انڈیا گیٹ پر بھی بڑی تعداد میں مظاہرین جمع ہیں اور مسلسل سی اے اے اور این آرسي کے خلاف نعرے بازی کر رہے ہیں۔
مظاہرے کو مدنظر رکھتے ہوئے منڈی ہاؤس سے آئی ٹی او کی جانب جانے والی سڑکوں پر ٹریفک روک دی گئی ہے۔ اس کے ساتھ لوگوں کی آمد و رفت کو کنٹرول کرنے اور سکیورٹی وجوہات پر پرانی دہلی کے چاوڑي بازار، لال قلعہ، جامع مسجد دہلی گیٹ میٹرو اسٹیشنوں کو بند کیا گیا۔ مختلف طلباء تنظیموں کی جانب سے انڈیا گیٹ کے نزدیک شام کے احتجاج کے پیش نظر زیادہ مصروف علاقے کشمیری گیٹ، راجیو چوک، مرکزی سیکرٹریٹ، منڈی ہاؤس، جن پتھ، خان بازار میٹرو اسٹیشن کو بند کیا گیا ہے۔
