جموں: جموں کشمیر کے وزیر اعلیٰ عمر عبداللہ نے پیر کو جموں میں زیر تعمیر قانون ساز اسمبلی کمپلیکس کا دورہ کیا۔ اس موقع پر انہوں نے عمارت کی تعمیراتی پیشرفت کا جائزہ لیا اور مختلف پہلوؤں پر متعلقہ افسران سے تبادلہ خیال کیا۔ وزیر اعلیٰ نے سائٹ پر موجود انجینئرز اور افسران سے تعمیر کی رفتار، معیار اور حفاظت کے حوالے سے تفصیلی معلومات لیں اور اس بات پر زور دیا کہ اسمبلی عمارت کی بروقت تکمیل ریاست کی انتظامی کارکردگی کو بہتر بنانے کے لئے ناگزیر ہے۔
عمر عبداللہ نے متعلقہ افسران کو منصوبے کی بروقت تکمیل اور معیار کی پاسداری یقینی بنانے کی ہدایت کی۔ انہوں نے کہا کہ اس عمارت کی تعمیر ریاستی ترقی کے لیے ایک اہم قدم ہے۔ اس سے قبل پیر کو عمر عبداللہ نے ناقص موسمی حالات کے سبب جموں کا سفر بذریعہ سڑک طے کیا، کیونکہ سرینگر سے جموں پروازیں منسوخ ہو گئیں۔
جموں سیکریٹریٹ پہنچنے پر وزیر اعلیٰ کا گرمجوشی سے استقبال کیا گیا۔ مختلف ارکان اسمبلی، رہنما اور افسران نے ان کا خیرمقدم کیا، جس سے سیکریٹریٹ میں خوشگوار ماحول پیدا ہوا۔ واضح رہے کہ حکومت نے پہلے ہی ہدایت دی تھی کہ تمام انتظامی افسران 11 نومبر سے جموں سیکریٹریٹ میں اپنی موجودگی کو یقینی بنائیں۔
یہ بھی پڑھیں: سرکاری ملازمین کی جبری برطرفی، محبوبہ مفتی نے لکھا وزیر اعلیٰ عمر عبداللہ کو خط
شمالی کشمیر میں برفباری، پروازیں منسوخ، عمر عبداللہ 'مجبوراً' براستہ سڑک جموں پہنچے
