ملک میں تیزی سے پھیل رہے کورونا انفیکشن کے پیش نظر وزیراعظم نریندر مودی نے سنت برادری سے ہری دوار میں چل رہے کمبھ میلے کو محدود کر کے اسے علامتی رکھنے کی اپیل کی ہے۔
پی ایم مودی نے سنیچر کو جونا اکھاڑہ کے آچاریہ مہا منڈلیشور سوامی اودھیش آنند گری سے فون پر بات کرنے کے بعد ٹویٹ کرکے کمبھ میلے کو محدود پیمانے پر منعقد کرنے کے اشارے دیئے ہیں۔
وزیراعظم نے ٹویٹر پر کہا ’’اچاریہ مہا منڈلیشور سوامی اودھیش آنند گری جی سے آج فون پر بات کی۔ سبھی سنتوں کی صحت کا حال دریافت کیا۔ سبھی سنت انتظامیہ سے ہر طرح کا تعاون کررہے ہیں۔ میں نے اس کے لیے سنت برادری کا شکریہ ادا کیا۔‘‘
انہوں نے ایک دیگر ٹویٹ میں کہا کہ ’’میں نے پرارتھان کی ہے کہ دو شاہی اسنان ہوچکے ہیں اور اب کمبھ کو کورونا کے بحران کے سبب علامتی ہی رکھا جائے۔ اس سے اس بحران سے لڑائی کو ایک طاقت ملے گی‘‘۔
سوامی اودھیش آنند گری نے بھی ٹویٹ کیا اور کہا ’’ہم عزت مآب وزیر اعظم کی اپیل کا احترام کرتے ہیں۔ زندگی کا تحفظ ایک انتہائی ضروری چیز ہے۔ میری برادری عوام سے درخواست کرتی ہیں کہ کووڈ کے حالات کو دیکھتے ہوئے بڑی تعداد میں اسنان کے لیے نہ آئیں اور ضابطوں کی پابندی کریں‘‘۔
واضح رہے کہ ہری دوار مہاکنبھ میں شاہی اسنان کے لیے پہنچی بڑی تعداد میں سنت کورونا وائرس سے متاثر ہو رہے ہیں۔
