ناردرن ریلوے نے اولمپئن سشیل کمار کو معطل کیا

دہلی کے چھترسال اسٹیڈیم میں پہلوان ساگر ڈھنکر کے قتل کے بعد سے فرار اولمپئن پہلوان سشیل کمار کو دہلی پولیس کے ذریعے گرفتار کئے جانے کے بعد ناردرن ریلوے نے معطل کر دیا ہے۔

ناردرن ریلوے کے سی پی آر او دیپک کمار کے مطابق سشیل کمار ناردرن ریلوے میں سینئر کمرشیل مینیجر کے عہدہ پر فائز تھے۔ انہیں 23 سالہ پہلوان ساگر رانا کے قتل کے الزام میں پولیس نے گرفتار کر لیا ہے جس کے بعد ریلوے نے یہ کارروائی کی ہے۔

واضح رہے کہ انسپکٹر شیو کمار، انسپکٹر کرم ویر اور اے سی پی اوتار سنگھ کی سربراہی میں خصوصی سیل نے دہلی کے منڈکا سے سشیل کمار اور اجے کو کل گرفتار کیا تھا۔

اس سے قبل دہلی کی روہنی عدالت نے سشیل کی پیشگی ضمانت کی درخواست خارج کردی تھی۔ دہلی پولیس نے بتایا کہ ان دونوں ملزموں کو 23 سالہ ساگر رانا کے قتل کے سلسلے میں اتوار کی صبح دہلی کے منڈکا علاقے سے گرفتار کیا گیا ہے۔

گرفتار ہونے والوں میں پہلوان سشیل کمار کے ساتھی اجے عرف سنیل بھی شامل ہیں۔ سشیل پہلوان پر ایک لاکھ کا انعام جبکہ اجے پر 50،000 روپے کے انعام کا اعلان کیا گیا تھا۔ پولیس نے دونوں کے خلاف لک آوٹ نوٹس بھی جاری کیا تھا۔

واضح رہے کہ 4 مئی کی شب دہلی کے چھترسال اسٹیڈیم کمپلیکس میں سشیل کمار اور کچھ دوسرے پہلوانوں سے جھگڑا ہوا تھا، اس واقعے میں پہلوان ساگر دھنکر کی موت ہو گئی تھی۔

اسی دوران ساگر کے دوست سونو اور امت کمار زخمی ہوگئے، جس میں سشیل کمار کو ملزم بنایا گیا ہے۔ دہلی کی ایک عدالت نے سشیل کمار اور 6 دیگر افراد کے خلاف ناقابل ضمانت وارنٹ جاری کیا تھا۔

دہلی پولیس نے اس معاملے میں دفعہ 302 قتل، دفعہ 308 غیر ارادتاً قتل، دفعہ 325، دفعہ 323، دفعہ 341 اور دفعہ 506 کے تحت ایف آئی آر درج کی ہے۔