نئی دہلی: جامعہ ملیہ اسلامیہ شعبہ اردو کے ممتاز فکشن نگار پروفیسر خالد جاوید کے ناول 'نعمت خانہ' کا انگریزی ترجمہ باوقار ادبی ایوارڈ جے سی بی انعام برائے ادب 2022 کے لیے بھارت کی تمام زبانوں سے منتخب دس ناولوں کی فہرست میں شامل کیا گیا ہے۔JCB Award
اس فہرست میں چار انگریزی اور چھ غیر انگریزی زبانوں میں لکھے گئے ناولوں کے انگریزی تراجم کو جگہ دی گئی ہے۔ اس ایوارڈ کی مالیت 25 لاکھ روپے ہے۔ اس خبر سے جامعہ برادری میں خوشی کی لہر ہے۔ جامعہ ملیہ اسلامیہ کی وائس چانسلر پروفیسر نجمہ اختر نے جامعہ کے لیے اس کو ایک فخر کا لمحہ قرار دیتے ہوئے اس نیک خواہش کا اظہار کیا ہے کہ یہ ناول ’جے سی بی انعام برائے ادب 2022‘ کے آخری مرحلے میں بھی منتخب کرلیا جائے۔
پروفیسر خالد جاوید کے تین ناول 'موت کی کتاب'، 'نعمت خانہ' اور 'ایک خنجر پانی میں' بہت مقبول ہوچکے ہیں اور ان کا چوتھا ناول 'ارسلان اور بہزاد' بہت جلدمنظرِ عام پر آنے والا ہے۔ انہیں ملک بھر کے ممتاز ادبی اداروں کی جانب سے کئی باوقار ایوارڈز سے بھی نوازا جا چکا ہے۔
