نوئیڈا اور گریٹر نوئیڈا میں پولیس کے انکاؤنٹر کا سلسلہ جاری ہے اسی ضمن میں پولیس نے دیر رات سیکٹر 58 تھانہ کے تحت بگڈی پارک رام لیلا گراؤنڈ کے پاس سیکٹر 62 میں پولیس نے گائے سمگلرکے ملزم کو تصادم میں زخمی ہونے کے بعد گرفتار کرلیا ہے۔
گرفتار ہونے والوں میں جامعہ نگر دہلی کے پہلوان چوک بٹلہ ہاؤس کے گلزار قریشی ولد یونس قریشی اور گاؤں اجراڈا پولیس تھانہ مڈالی ضلع میرٹھ اترپردیش کے رضوان قریشی ولد مومن قریشی شامل ہیں۔
دونوں ملزمان بلند شہر سے 25، 25 ہزار اور علی گڑھ سے 25، 25 ہزارروپے کے انعامی ملزمین ہیں۔
واضح رہے کہ ملزم کے قبضے سے سوئفٹ ڈیزائیر کار اور ایک پستول 315 بور، ایک زندہ کارتوس 315 بور اور ایک پستول 32 بور، دو زندہ کارتوس برآمد ہوئے ہیں۔
پولیس کے مطابق گشت کے دوران ایک کار سیکٹر 62 کی جانب سے آتی ہوئی دکھائی دی جس کے بعد پولیس نے اس کار کو روکنے کی کوشش کی لیکن انہوں نے گاڑی کی رفتار بڑھا دی اور بھاگنے لگے۔
بھاگنے کے دوران تیز رفتار سوئفٹ کار بے قابو ہو کر ڈیوائڈر سے ٹکرا گئی جس کے بعد یہ گاڑی سے اتر کر بھاگنے لگے۔
جب پولیس نے گھیرا تنگ کیا تو انہوں نے پولیس پر فائرنگ کردی، جوابی فائرنگ میں دونوں ملزمان زخمی ہوگئے۔
پولیس کا کہنا ہے کہ ان کے خلاف مذکورہ شہروں کے علاوہ غازی آباد، میرٹھ، ہاپوڑ اور بلند شہر میں درجنوں مقدمات درج ہیں۔
