نئی دہلی: تین سال بعد دہلی یونیورسٹی میں طلبہ یونین کے انتخابات پرامن طریقے سے ہوئے۔ ہفتہ کو ڈی یو کی آرٹس فیکلٹی میں صبح 8.30 بجے ووٹوں کی گنتی شروع ہوئی جو ابھی جاری ہے۔ اس سلسلے میں سیکیورٹی کے سخت انتظامات کیے گئے ہیں۔ دہلی پولیس کے 500 سے زائد اہلکار تعینات ہیں اور دیگر فورسز سے بھی مدد لی گئی ہے۔ دہلی ٹریفک پولیس نے بھی انتخابی نتائج کے پیش نظر ایک ایڈوائزری جاری کی ہے۔
اے بی وی پی کارکنوں کو یقین ہے کہ اے بی وی پی امیدوار دہلی یونیورسٹی طلبہ یونین کے انتخابات میں چاروں سیٹوں پر بھاری فرق سے جیت کو یقینی بنائیں گے۔ این ایس یو آئی کے امیدوار اور ان کے حامی بھی ایسے ہی دعوے کر رہے ہیں۔ تاہم ہمیں یہ جاننے کے لیے صرف چند گھنٹے انتظار کرنا ہوگا کہ کون سی تنظیم انتخابات میں کامیابی حاصل کرے گی۔
یہ بھی پڑھیں:اے ایم یو میں طلباء یونین کے انتخابات جلد کرانے کا مطالبہ
آج 24 امیدواروں کے مستقبل کا فیصلہ ہونا ہے جنہوں نے اسٹوڈنٹ یونین کے انتخابات میں صدر، نائب صدر، سیکریٹری اور جوائینٹ سیکریٹری کے عہدوں کے لیے نامزدگی داخل کئے اور الیکشن لڑا ۔ نارتھ کیمپس میں تمام جماعتوں کے امیدوار موجود ہیں۔ الیکشن افسر کے اعلان کا سب کو انتظار ہے۔ خیال کیا جاتا ہے کہ اس الیکشن میں تقریباً 40 فیصد ووٹنگ ہوئی ہے۔ تاہم ڈی یو الیکشن آفیسر کی جانب سے ابھی تک یہ ڈیٹا جاری نہیں کیا گیا ہے۔ انتخابی نتائج کے بعد فیصلہ کیا جائے گا اور اعداد و شمار جاری کیے جائیں گے کہ اس بار کتنے فیصد ووٹ ڈالے گئے۔ پچھلے سال 18 ہزار سے زیادہ ووٹ اے بی وی پی کے کھاتے میں آئے تھے۔
دہلی یونیورسٹی اسٹوڈنٹس یونین کے انتخابی نتائج کو دیکھتے ہوئے دہلی ٹریفک پولیس نے ایک ایڈوائزری جاری کی ہے۔ اس ایڈوائزری کے مطابق نارتھ کیمپس ایریا میں کمرشل گاڑیوں کے داخلے پر مکمل پابندی ہے۔ یہ پابندی چھاتر مارگ پر بھی لاگو ہے۔ پولیس نے آج اس راستے پر آنے سے گریز کرنے کی اپیل کی ہے۔
