پولیس کی مبینہ پرتشدد کارروائی میں کئی خاندانوں نے اپنے چشم و چراغ کھو دیے، ان کا غم پہاڑوں جیسا ہے۔
کانپور میں مظاہرہ کے دوران ہلاک ہونے والے محمد رئیس کے والد محمد شریف اور آفتاب عالم کی والدہ نجمہ بانو کی ای ٹی وی بھارت کے نمائندہ سے گفتگو کے دوران آنکھیں اشکبار ہو گئیں۔
بہار سے آئے محمد حنظلہ کے والد محمد سہیل بھی اپنے جواں سال بیٹے کی موت سے غم میں ڈوبے ہوئے ہیں۔
شہریت ترمیمی قانون کے خلاف مظاہروں کے دوران پولیس کی گولیوں اور سخت گیر ہندو جماعتوں کے ہاتھوں ہلاک ہونے والے جوان لڑکوں کے والدین دہلی پہنچے اور منڈی ہاؤس سے پارلیمنٹ تک مارچ میں شامل ہوئے۔
اس موقع پر انہوں نے جنتر منتر پر عوام سے خطاب کرتے ہوئے اپنے دکھ اور درد کی داستان بیان کی۔
محمد رئیس کے والد محمد شریف نے بتایا کہ 'رئیس ان کا اکلوتا سہارا تھا، اب اسے بھی چھین لیا، وہ تو روزی روٹی کے لیے گھر سے نکلا تھا کہ پولیس کے مبینہ تشدد کا شکار بن گیا۔
انہوں نے روتے ہوئے کہا کہ 'انہیں انصاف چاہیے اور اللہ ان کو ضرور انصاف دلائے گا۔ محمد رئیس کے والد نے مزید کہا کہ 'میرے بیٹے کا مظاہروں سے کوئی تعلق نہیں تھا، پھر بھی اسے مار دیا گیا لیکن اب یہ بوڑھا باپ اس لڑائی میں شامل ہے۔
اسی طرح آفتاب عالم کی والدہ نجمہ بانو کا درد بھی کچھ اسی طرح ہے، وہ دو لفظ بھی بولنے سے قاصر ہیں کیوں کہ جیسے ہی وہ اپنے بیٹے کو یاد کرتی ہیں ان کا گلہ بھر آتا ہے اور آنکھوں سے آنسو جاری ہوجاتے ہیں۔
بہار کے پھلواری شریف کے ساکن محمد سہیل جن کا بیٹے پولیس کے مبینہ تشدد کا شکار بنا تھا نے کہا کہ 'وہ اپنے دوسرے بچوں کو بھی 'شہریت ترمیمی قانون کے خلاف احتجاج میں شامل کرتے ہیں، انہوں نے کہا کہ گھر میں مرنے سے اچھا ہے کہ سڑکوں پر جمہوریت کے تحفظ کے لیے جدو جہد کریں۔
واضح رہے کہ نجمہ بانو کا بیٹا آفتاب عالم 20 دسمبر 2019 کو نماز ادا کر کے واپس آ رہا تھا کہ پولیس کی گولی کا شکار ہوا، جب کہ محمد رئیس کانپور مظاہرے کے دوران اس کے علاوہ حنظلہ 21 دسمبر کو پھلواری شریف سے غائب ہوگیا تھا اور اس کی لاش 10 دن بعد ملی تھی۔
