زبانوں کے استعمال میں مواد کی کمی ایک رکاوٹ

حکومت نے آج کہا کہ وہ سبھی مقابلہ جاتی امتحانات کو ملک کی سبھی زبانوں میں کرانے کے لئے کوشاں ہے لیکن مستند مواد اور اچھے ترجمہ نگاروں کی کمی اس سمت میں ایک بڑی رکاوٹ بنی ہوئی ہے جسے دور کرنے کی کوشش کی جارہی ہے۔

شکایت عامہ اور پنشن کے وزیر مملکت ڈاکٹر جتیندر سنگھ نے لوک سبھا میں وقفہ سوال میں ایک ضمنی سوال کے جواب میں کہا کہ مودی حکومت جب سے اقتدار میں آئی ہے تب سے 1968کے راج بھاشا قانون کو نافذ کرنے کی کوشش کررہی ہے۔

ان پانچ برسوں میں ہندی اور دیگر علاقائی زبانوں کا استعمال کافی بڑھا ہے۔

زبانوں کے استعمال میں مواد کی کمی ایک رکاوٹ

ڈاکٹر سنگھ نے کہا کہ حکومت چاہتی ہے کہ یقیناً آٹھویں فہرست میں درج سبھی زبانوں میں سرکاری مقابلہ جاتی امتحانات منعقد کئے جائیں۔

لیکن اس کے لئے مواد بھی اعلی سطح پر ہونا چاہئے،انہوں نے کہا کہ اس سطح کے مترجموں کی کمی ہے جس سے اعلی سطحی مواد مہیا نہیں ہے،حکومت کوشش کررہی ہے کہ یہ کمی دور ہو اور زیادہ سے زیادہ مستند مواد مہیا ہوسکے۔