اب اس پورے معاملے پر دہلی کے وزیر اعلیٰ اروند کیجریوال نے آج پریس کانفرنس سے خطاب کرتے ہوئے کہا کہ جو لوگ اس دور میں بھی زہر افشانی بیانات دیتے ہوئے ہندو مسلم کر رہے ہیں وہ نہ صرف سماج کے دشمن ہیں بلکہ وہ بھارت کے بھی دشمن ہیں۔
حالانکہ کچھ روز قبل تک دہلی کے وزیراعلیٰ اروند کیجریوال اپنی میڈیا بریفنگ کے دوران کورونا وائرس سے متعلق جو اعداد و شمار بتا رہے تھے، ان میں تبلیغی جماعت کا ذکر الگ سے کیا جا رہا تھا۔
جس پر دہلی اقلیتی کمیشن نے بھی اعتراض جتاتے ہوئے کہا تھا کہ حکومت کے اس انداز سے عوام کے درمیان ایک غلط اطلاع پہنچ رہی ہے، جس کے منفی اثرات بعد میں بوانہ اور دیگر علاقوں میں دیکھنے کو ملے جہاں مذہب کی بنیاد پر ایک خاص طبقہ کے لوگوں کے ساتھ مار پیٹ کی خبریں سامنے آئیں۔
حالانکہ دہلی حکومت کی جانب سے اس طرح کے اعلان میں کافی دیر ہوئی تاہم دہلی حکومت کی جانب سے نفرت کے خلاف اٹھایا گیا یہ قدم قابل قبول ہے۔
