دہلی کے حالات کا ذمہ دار کون ہے؟

دہلی اقلیتی کمیشن کے چیئرمین ڈاکٹر ظفرالاسلام خان کا کہنا ہے کہ 'شمال مشرقی دہلی میں گذشتہ 2 روز سے جو حالات بنے ہوئے ہیں، ان کے پیچھے وزیر داخلہ کا ہاتھ ہے۔'

گزشتہ دو روز سے شمال مشرقی دہلی کے موجپور، کراول نگر، سیلم پور، بابر پور، گونڈا، مصطفیٰ آباد، گوکل پوری، جعفرآباد اور اشوک نگر وغیرہ علاقوں میں مسلسل تشدد کی خبریں سامنے آرہی ہیں۔

اب تک 13 افراد کے ہلاک اور 135 سے زائد کے زخمی ہونے کی تصدیق کی جا چکی ہے جس میں 70 سے زائد بندوق کی گولی سے زخمی ہوئے ہیں۔

اس صورت حال کو دیکھتے ہوئے دہلی اقلیتی کمیشن کے چیئرمین ڈاکٹر ظفرالاسلام خان نے دہلی کے لیفٹیننٹ گورنر انل بیجل کو خط لکھ کر اقلیتی فرقہ کے تحفظ سے متعلق درخواست کی ہے۔

اس دوران دہلی اقلیتی کمیشن کے چیئرمین ڈاکٹر ظفرالاسلام خان نے ای ٹی وی بھارت کے نمائندے سے بات کرتے ہوئے کہا کہ 'شمال مشرقی دہلی میں آتشزدگی اور لوٹ مار کے واقعات کے پیچھے کپل مشرا ہیں اور یہ سب کچھ بھارتی وزیر داخلہ امت شاہ کے اشارے پر کیا جا رہا ہے۔