متنازع شہریت ترمیمی قانون کے خلاف دارالحکومت دہلی میں گزشتہ شب 10 بجے سے خواتین کی ایک بڑی تعداد نے جعفر آباد کا مین روڈ جام کرتے ہوئے اپنا احتجاج شروع کر دیا ہے۔
جعفر آباد علاقہ میں خواتین مظاہرین کے ذریعے سڑک بند کرنے کے بعد کثیر تعداد میں پولیس اہلکاروں کو تعینات کیا گیا ہے۔
اس دوران پوری رات احتجاجی مظاہرین اور پولیس کے درمیان افہام و تفہیم کا دور جاری رہا۔ تاہم ابھی تک کوئی حل نہیں نکل سکا ہے۔
پولیس، مظاہرین کو تو سڑک سے ہٹانے میں کامیاب نہیں ہو پائی ہے۔ تاہم خواتین کے ذریعہ بنایا گیا اسٹیج پولیس نے ہٹا دیا ہے۔
پولیس نے صبح ہوتے ہی پیرا ملٹری فورسز اور دیگر تھانوں سے بھی پولیس کی ایک بڑی تعداد کو موقع پر تعینات کر دیا ہے۔
قابل ذکر ہے کہ آج بھیم آرمی کے چیف چندر شیکھر آزاد کی جانب سے بھارت بند کا اعلان کیا گیا تھا۔ اسی کے مدنظر جعفرآباد کی سڑک جام کرنے کا کام کیا گیا ہے۔
