وسطی کشمیر کے ضلع بڈگام میں آج صبح سے ہی شدید برفباری ہو رہی ہے جس سے لوگوں کو شدید مشکلات کا سامنا کرنا پڑ رہا ہے۔ گزشتہ روز بھی ضلع انتظامیہ کی جانب سے سڑکوں سے برف ہٹائی گئی تھی۔
گزشتہ روز ڈی سی بڈگام شہباز احمد مرزا نے بھی کئی علاقوں کا دورہ کیا اور لوگوں سے انتظامات کے بارے میں جانکاری حاصل کی۔ بڈگام میں کل انتظامیہ کی جانب سے ضلعی و سب ضلعی سڑکوں سے برف ہٹائی گئی تھی وہیں آج صرف مین سڑکوں سے برف ہٹائی گئی۔ جبکہ لنک روڈ سے برف نہیں ہٹائی گئی جس وجہ سے لوگوں کو نقل و حمل میں کافی دشواریوں کا سامنا کرنا پڑ رہا ہے۔
بڈگام انتظامیہ نے پہلے ہی ایک 24*7 کنٹرول روم کا قیام عمل میں لایا ہے۔ عوام اس کنٹرول روم سے براہ راست رابطہ کر کے اپنی شکایات درج کرا سکتے ہیں تاکہ ان کا ازالہ کیا جائے۔ یہ کنٹرول روم ڈی سی کمپلیکس کے اندر واقع ہے۔ عوام ٹیلی فون کے ذریعے رابطہ کر سکتے ہیں۔
ڈی سی بڈگام شہباز احمد مرزا نے تمام لائن ڈیپارٹمنٹس کو کل ہی احکامات جاری کئے ہیں کہ وہ ضلع کی تمام سڑکوں سے برف صاف کریں اور لوگوں کے لیے سبھی خورد و نوش کی چیزیں مہیا رکھے۔
انہوں نے مزید بتایا کہ ضلع میں بجلی اور پانی کی فراہمی کو یقینی بنائیں تاکہ برفباری میں لوگوں کو پریشانی نہ ہو۔ اس کے علاوہ ہسپتالوں میں گرمی کا معقول انتظام کریں تاکہ وہاں داخل بیماروں اور ان کے ساتھ تیمار داروں کو تکلیف نہ اُٹھانی پڑے۔
بڈگام ضلع کے بالائی علاقوں میں صبح سے ہی کافی برف جمع ہوچکی ہے اور ابھی تک برفباری رکنے کا نام ہی نہیں لے رہی ہے۔ اس شدید برفباری سے میوہ باغات کو بھی نقصان پہنچنے کی خبریں موصول ہو رہی ہیں۔
