بڈگام کے راستے پہلے سے ہی کافی تنگ ہیں اور جب برفباری ہوتی ہے تو ان تنگ راستوں سے گزرنا کافی دشوار ہو جاتا ہے، اس کے علاوہ دوسری مشکل اس وقت پیش آتی ہے جب تنگ راستوں پر واقع گھروں کے چھتوں پر موجود برف سڑک پر گر جاتی ہے جس سے مشکلات میں مزید اضافہ ہو جاتا ہے، اور بسا اوقات جب یہ بھاری برف چھتوں سے گرتی ہے تو اس کے وزن اور رفتار راہگیروں کے لیے حادثے کا سبب بھی بنتا ہے۔
مستقبل میں حادثہ نا ہو جس کے لیے میونسپل کونسل بڈگام نے ایک ایڈوائزری جاری کرتے ہوئے راستوں میں واقع گھروں کی چھتوں پر ہی اسنو اسٹاپر لگانے کے احکامات صادر کئے ہیں، میونسپل کونسل کی جانب سے جاری کردہ ایڈوائزری کی مقامی لوگوں نے ستائش کی ہے۔
میونسپل کونسل بڈگام کے چئیرمین معراج الدین کے مطابق برفباری کے دوران راستے بند ہو تے ہیں، اور جب ہم راستوں سے برف ہٹا دیتے ہیں تو اسکے بعد چھتوں سے برف گرتی ہے جس کی وجہ سے راستے دوبارہ بند ہوتے ہیں، اس کے علاوہ چھتوں سے برف گرنے کی وجہ سے سڑکوں سے چلنے والوں کو بھی خطرہ بنا رہتا ہے۔
میونسپل کونسل بڈگام نے اپنے جاری کردہ ایڈوائزری پر سختی عمل کرانے کے لیے عوام کو آگاہ بھی کیا ہے کہ اگر کوئی بھی شخص اس کی خلاف ورزی کرتا ہے تو اس کے خلاف سخت کاروائی بھی کی جائے گی۔
میونسپل کونسل بڈگام کی نئی ایڈوائزری سے جہاں انتظامیہ کو کافی آسانی پیدا ہوگی وہیں ایمرجنسی کے دوران لوگوں کو مشکلات کا سامنا بھی نہیں کرنا پڑے گا۔
