دربھنگہ: بدمعاشوں سے پریشان گاؤں والے پہنچے ایس پی دفتر

ریاست بہار کے ضلع دربھنگہ کے تلکیشور پنچایت کے درجنوں عوام اپنے ہی پنچایت کے جرائم پیشہ افراد شنکر یادو کے خوف سے پریشان ہوکر انصاف کے لیے دربھنگہ ایس ایس پی بابو رام کے دفتر پہنچ گئے، حالانکہ گھنٹوں انتظار کے بعد بھی ان فریادیوں کی ملاقات ایس ایس پی سے نہیں ہو سکی۔

ان فریادیوں کے ساتھ رہبری کرنے آئے اسی پنچایت کے مکھیا کے شوہر کرن دیو مکھیا نے ای ٹی وی بھارت سے گفتگو کرتے ہوئے کہا کہ، 'ان کے پنچایت کے شنکر یادو اپنے گرگے کے ساتھ مل کر آئے دن گاؤں والوں کو پریشان کرتے ہیں۔ بہو بیٹیوں کے ساتھ نازیبا سلوک کرتے ہیں۔'

انہوں نے الزام عائد کرتے ہوئے کہا کہ شنکر یادو کسی کا بھی کھیت جوت لیتے ہیں تو کسی کی فصل کاٹ لیتے ہیں اور کسی کو مار پیٹ دیتے ہیں۔ انہیں کسی کا ڈر نہیں ہوتا ہے۔'

انہوں نے بتایا کہ، 'تلکیشور اوپی کے گاؤں کے افراد شنکر یادو کے خلاف کوئی شکایت بھی کرتے ہیں تو شنکر یادو پر کاروائی نہیں ہوتی۔'

انہوں نے بتایا کہ، 'اس پر پہلے سے بھی کئی معاملے درج ہیں، پھر بھی کارروائی نہیں ہوتی ہے، اگر وقت رہتے اس پر اور مقامی تھانہ انچارج پر کاروائی نہیں ہوئی تو آنے والے وقت میں کچھ بھی ہو سکتا ہے۔ اسی لئے گاؤں والے مجبور ہوکر انصاف کے لیے درخواست لیکر دربھنگہ کے ایس ایس پی دفتر پہنچے ہیں۔