کانگریس پارٹی کی رکنیت حاصل کرنے پر عمیر خان کا والہانہ استقبال

گیا کانگریس دفتر میں استقبالیہ تقریب سے خطاب کرتے ہوئے عمیر خان عرف ٹکا خان نے کہا کہ 'ملک میں مہاتما گاندھی کی آئیڈیالوجی کو مودی حکومت ختم کرکے ناگپوری آئیڈیالوجی عوام پر تھوپنے کی مہم میں ہے۔

ریاست بہار کے ضلع گیا میں واقع راجندر آشرم کانگریس دفتر میں کانگریسی رہنما عمیر خان کا والہانہ استقبال کیا گیا۔ عمیر خان گزشتہ 24 جولائی کو جن ادھیکار پارٹی سے مستعفی ہوکر آل انڈیا کانگریس دفتر دلی میں کانگریس پارٹی کی رکنیت حاصل کی تھی۔ عمیر خان کا تعلق ضلع گیا کے ایک بڑے سیاسی گھرانے سے ہے وہ گیا ضلع پریشد کے عہدے پر فائز ہیں۔

گیا کانگریس دفتر میں استقبالیہ تقریب سے خطاب کرتے ہوئے عمیر خان عرف ٹکا خان نے کہا کہ 'ملک میں مہاتما گاندھی کی آئیڈیالوجی کو مودی حکومت ختم کرکے ناگپوری آئیڈیالوجی عوام پر تھوپنے کی مہم میں ہے۔ ملک کا ہر شعبہ خواہ وہ تجارتی ہو یا زراعتی شعبہ ہو سبھی کو اپنے مستقبل کے بارے میں فکر لاحق ہے کیونکہ سبھی شعبے پر مودی حکومت کی غلط پالیسیوں سے گہرا اثر پڑا ہے۔'

انہوں نے کہا کہ 'مودی حکومت نے گزشتہ سات برسوں میں انصاف اور آئین کا گلا گھونٹا ہے۔ آئین کی روح مجروح کرنے کی کوشش مودی حکومت نے کی ہے۔ سرکاری ایجنسیوں کو ملک کے تحفظ میں لگانے کے بجائے اپنے سیاسی مخالفین پر نگرانی کرنے اور انہیں پریشان کرنے میں لگایا ہے۔ ملک میں مودی حکومت کے خلاف اگر کوئی ڈٹ کر مقابلہ کررہا ہے تو وہ کانگریس پارٹی کے رہنما راہل گاندھی ہیں جنہوں نے ہر مورچہ پر حکومت کو آئینہ دکھایا ہے۔'

انہوں نے کہا کہ 'راہل گاندھی کی بے باکی اور صاف گوئی سے ہی متاثر ہو کر انہوں نے کانگریس پارٹی کے اقلیتی شعبہ کے قومی صدر عمران پرتاپ گڑھی کی پہل پر کانگریس کی رکنیت حاصل کی ہے۔ دراصل عمیر خان عرف ٹکا خان کا سیاسی گھرانہ رہا ہے انکے والد مرحوم اخیار خان اندرا گاندھی کے دور اقتدار میں بہار کے سینئر کانگریسی رہنما تھے۔'

عمیر خان کے ماموں مرحوم شکیل احمد خان بہار کے قدآور رہنماء تھے اور انہوں نے لالو رابڑی حکومت میں بہار کے کئی بڑی وزرات کی ذمہ داری نبھائی ہے۔ عمیر خان اس سے پہلے سابق رکن پارلیمان راجیش رنجن عرف پپو یادو کی پارٹی جن ادھیکار پارٹی کے ریاستی کارگزار صدر کے عہدے کے ساتھ ریاستی ترجمان کی ذمہ داری سنبھال رہے تھے۔'

عمیر خان نے 2020 کے اسمبلی انتخابات میں جن ادھیکار پارٹی کی ٹکٹ پر شیرگھاٹی اسمبلی حلقے سے انتخاب بھی لڑ چکے ہیں اور انہیں بیس ہزار سے زیادہ ووٹ حاصل ہوئے تھے۔ عمیر خان بہار کی سیاست میں اس وقت سرخیوں میں آئے تھے جب سی اے اے اور این آر سی کے مدے پر شہر گیا کے شانتی باغ میں انہوں نے قریب سو دنوں تک غیر معینہ دھرنا دیا تھا۔

سیکڑوں گاڑیوں سے کانگریس کے کارکنوں نے گھر سے دفتر تک پہنچے جہاں پر کانگریس کے سینئر رہنما و سابق ریاستی وزیر اودھیش سنگھ، ضلع صدر چندریکا پرساد، مگدھ ترجمان وجے کمار میٹھو، اقلیتی سیل کے ضلع صدر ایوب خان عرف قمر خان ضلع پریشد رکن، ڈاکٹر حامد حسین، محمد خیرالدین وغیرہ نے پھولوں کا ہار اور شال پیش کرکے استقبال کیا۔

اس موقع پر سابق وزیر اودھیش سنگھ نے کہا کہ 'عمیر خان کا گھرانہ پرانے کانگریسی ہے، عمیر خان جیسے بے باک اور پڑھے لکھے نوجوان کی آمد سے بہار کانگریس مضبوط ہوگی، کانگریس پارٹی کو چاہیے کہ انہیں کانگریس کے مین اسٹریم میں لاکر اہم ذمہ داری دے کیونکہ عمیر خان کی بہار میں اپنی ایک الگ پہچان ہے اور وہ زمین سے جڑے ہوئے رہنما ہیں۔'

اودھیش سنگھ نے اس موقع پر مرکزی حکومت کو تنقید کا نشانہ بنایا اور کہا کہ 'آج ایسے حالات پیدا ہوگئے ہیں ملک میں ہی دو ریاست سرحد کو لیکر خونی جنگ لڑ رہے ہیں۔ چین اور پڑوسی دشمن ملک ہم کو آنکھیں دیکھا رہے ہیں اور مودی جی ڈفلی بجانے میں لگے ہوئے ہیں۔'

جبکہ اس موقع پر قمر خان رکن ضلع پریشد نے کہا کہ 'عمیر خان سے نوجوان، غریب اور اقلیتی طبقہ جڑا ہوا ہے پارٹی کو ان سے مضبوطی حاصل ہوگی۔'