پٹنہ ہائی کورٹ نے ریاست میں کورونا سے پیدا ہوئے بحران پر تشویش کا اظہار کرتے ہوئے حکومت کو اس وبا کو کنٹرول کرنے کیلئے جاری کاموں کی پوری تفصیل جمعہ صبح تک دینے کی ہدایت دی ہے۔
چیف جسٹس سنجے کرول اور جسٹس ایس کمار کی بینچ نے شیوانی کوشک اور دیگر کی مفاد عامہ کی عرضیوں پر سماعت کرتے ہوئے یہ ہدایت دی ہے۔
عدالت نے حکومت سے ریاست کے کووڈ اسپتالوں میں مریضوں کے علاج کا نظم، دواﺅں اور آکسیجن کی سپلائی، آکسیجن ڈھونے والے ٹینکر سے متعلق پوری تفصیل دینے کو کہا ہے۔
ججوں نے ریاست کے اسپتالوں میں آکسیجن سپلائی نظام کو درست کرنے کی سخت ہدایت دی اور کہا کہ آکسیجن سپلائی کیلئے مرکز اور ریاستی حکومت آپسی تال میل سے نظام کو بہتر کریں۔ عدالت نے ریاستی حکومت سے جاننا چاہا کہ میڈیکل آکسیجن لانے کیلئے وافر مقدار میں ٹینکر ہے یا نہیں۔ اس کے ساتھ ہی عدالت نے یہ بھی پوچھا کہ استعمال کئے گئے پی پی ای کٹ سے انفیکشن نہ پھیلے اس کیلئے اسے تباہ کرنے کیلئے کیا انتظامات کئے گئے ہیں۔
اس سے قبل ریاستی حکومت کی جانب سے عدالت کو بتایا گیا کہ اسپتالوں میں منظم طریقے سے آکسیجن کی سپلائی کیلئے ہر ممکن قدم اٹھائے جارہے ہیں۔ آکسیجن کی سپلائی کیلئے مرکزی حکومت کی جانب سے سات ٹینکر دستیاب کرانے کی بات کہی گئی ہے اور اس میں سے چھ ٹینکر اب تک دستیاب بھی ہوچکے ہیں۔ مرکزی حکومت سے ریاست کو پورا تعاون مل رہاہے ۔ اس معاملے پر سماعت کل بھی جاری رہے گی۔
یو این آئی
