آر جے ڈی رہنما تیجسوی یادو نے ایک پریس کانفرنس میں مونگیر تصادم اور لاٹھی چارج پر سوال اٹھایا اور انتظامیہ پر بھی سخت نکتہ چینی کی۔
انھوں نے نتیش کمار پر سخت نکتہ چینی کرتے ہوئے کہا کہ وزیراعلی جو ریاست کے وزیر داخلہ بھی ہیں اس وقت وہ کیا کر رہے تھے۔
تیجسوی یادو نے یہ بھی سوال کیا کہ ریاست کے نائب وزیراعلی سشیل مودی نے اس معاملے میں ٹویٹ کرنے کے علاوہ اور کیا کیا ہے۔
آر جے ڈی رہنما نے کہا کہ وہ اس معاملے میں وزیراعلی نتیش کمار اور نائب وزیراعلی سشیل مودی سے پوچھنا چاہتے ہیں کہ مونگیر پولیس کو جنرل ڈائر بننے کی اجازت کس نے دی؟
واضح رہے کہ بدھ کے روز ریاست کے 16 ضلعوں کی 71 سیٹوں پر پہلے مرحلے کے تحت ووٹنگ جاری ہے۔ جس میں مہا گٹھ بندھن کی جانب سے آر جے ڈی نے 42 سیٹوں پر اپنے امیدوار اتارے ہیں جبکہ اتحادی جماعت کانگریس 21 سیٹوں پر انتخاب لڑرہی ہے اس کے علاوہ سی پی آئی اپنے 8 امیدواروں کے ساتھ میدان میں ہے۔
جبکہ نتیش کمار کی قیادت والی این ڈی اے میں جے ڈی یو نے 35 سیٹوں پر اپنے امیدوار اتارے ہیں جبکہ اتحادی جماعت بی جے پی اپنے 29 امیدواروں کے ساتھ قسمت آزمائی کررہی ہے۔
اس کے علاوہ جیتن رام مانجھی کی پارٹی ہندوستان عوام مورچہ 6 اور وی آئی پی پارٹی ایک سیٹ پر انتخاب لڑرہی ہے۔
