گیا شہر کے کوتوالی تھانہ حدود میں واقع خیرات احمدروڈ میں تیزرفتار بے قابو ٹرک کی زد میں ایک موٹرسائیکل سوار آگیا جس میں ایک شخص کی جائے حادثہ پر ہی موت ہوگئی ہے جبکہ ایک شخص کوسنگین حالت میں ہسپتال میں داخل کرایا گیا ہے۔ جہاں ابتدائی علاج کے بعد حالت سنگین ہوتے دیکھ کرڈاکٹروں نے پٹنہ پی ایم سی ایچ ریفر کردیا ہے۔
واقعہ بدھ کی صبح دس بجے کے قریب پیش آیا ہے۔ موٹرسائیکل سوار کی پہچان گیا کے سیوتر کا رہنے والا پریم پردیپ کے طور پر ہوئی ہے۔ اطلاع کے مطابق پریم پردیپ ریلوے میں ڈرائیور کے عہدے پرتعینات تھے اور وہ گھر سے اسٹیشن کے لئے ڈیوٹی پرجارہے تھے ۔اسکے ساتھ موجود دوسرا شخص بھی ریلوے میں ہی تعینات ہے۔ حادثے کے بعد مقامی افراد مشتعل ہوگِئے۔
ادھر ٹرک کو چھوڑ کرڈرائیور راہ فرار ہوگیا ۔واقعہ کی اطلاع ملتے ہی پولیس جائے حادثہ پر پہنچ کر لاش اور ٹرک کوقبضہ میں لیکر مشتعل افراد کوسمجھا کر پرسکون کرایا۔
متوفی پریم پردیپ کے ایک قریب سنتوش کمار نے بتایا کہ 'صبح پریم پردیپ گیا ریلوے اسٹیشن جارہے تھے ۔تبھی ایک بے قابو ٹرک کی زد میں آگئے۔ واقعہ کے بعد ٹرک ڈرائیور ٹرک کوچھوڑ کر فرار ہوگیا تھا۔'
