نتیش کمار مظفر پور کے شری کرشنا میڈیکل کالج اور اسپتال ایس کے ایم سی ایچ) گئے اور مریضوں کے کنبوں سے ملاقات کی۔
اسپتال کے باہر نتیش اور انتطامیہ کے خلاف مظاہرہ جاری ہے۔ بچوں کی موت سے بوکھلائے اہل خانہ نتیش کمار مردہ باد اور ہائے ہائے کے نعرے لگائے۔ لوگوں کا کہنا ہے، علاج ٹھیک سے نہیں ہورہا ہے، روز بچے مررہے ہیں۔ نتیش کمار اب کیوں جاگے ہیں، انہیں واپس چلے جانا چاہیے۔
نتیش کمار نے ڈاکٹروں اور افسران کے ساتھ جائزہ میٹنگ کی ۔
یاد رہے کہ چمکی بخار سے اموات کی تعداد بڑھنے کے باوجود سی ایم نتیش کمار کے مظفرپور نہ آنے پر مسلسل سوال اٹھائے جا رہے تھے۔
نتیش کمار کے دورے کی وجہ سے اسپتال میں سکیورٹی مستعد کردی گئی ہے۔
ایسے میں مریضوں اور ان کے اہل خانہ کو اور زیادہ پریشانیوں کا سامنا کرنا پڑرہا ہے۔
مظفر پور میں بچوں کی موت سے پورے ملک میں غم و غصہ ہے۔
بہار کی سابق وزیر اعلیٰ اور آر جے ڈی رہنما رابڑی دیوی نے نتیش کمار اور پی ایم مودی پر حملہ کرتے ہوئے اسے معصوموں کا قتل قرار دیا ہے۔
رابڑی دیوی نے ٹوئٹ کرکے کہا' این ڈی اے سرکار کی زبردست لاپروائی، وزیر اعلیٰ کی بدعنوان انتظام، وزیر صحت کے غیر ذمہ دار سلوک کی وجہ سے غریبوں کے 1000 سے زیادہ معصوم بچوں کی چمکی بخار کے بہانے قتل کیا گیا ہے۔'
