سیمانچل کے حصے میں پہلی بار نائب وزیر اعلیٰ کا عہدہ ملا ہے جن کا تعلق کٹیہار سے ہے۔ نائب وزیر اعلیٰ بننے کے بعد پہلی بار پٹنہ سے کٹیہار جانے کے دوران نومنتخب نائب وزیر اعلیٰ تارکشور پرساد کا ارریہ کے بی جے پی کارکنان نے بس اسٹینڈ واقع نیشنل ہائی وے پر زبردست استقبال کیا اور نعرے لگائے۔
استقبال کے دوران نائب وزیر اعلیٰ کو کارکنان نے گلدستہ، مالا اور روایتی پاگ پیش کیا۔ بعد ازاں صحافیوں سے گفتگو کرتے ہوئے نائب وزیر اعلیٰ تارکشور پرساد نے سیمانچل کے حوالے سے گفتگو کرتے ہوئے کہا کہ سیمانچل کی ترقی ہماری پہلی ترجیحات میں شامل ہے۔
سیمانچل والوں کے لیے یہ فخر کی بات ہے کہ انہوں نے آپ کے بیٹے کو اتنا بڑا عہدہ دیا۔ میں کٹیہار کا رکن اسمبلی ہوں اس لئے پورنیہ و سہرسہ زون کی ترقی کے لئے مجھ سے جو بن پڑے گا وہ میں کروں گا، صرف سیمانچل ہی نہیں بلکہ آنے والے دنوں میں پورے بہار کی ترقی کے لئے کام کریں گے۔
انہوں نے کہا کہ خود کفیل بھارت اور خود کفیل بہار کے لئے وزیر اعظم نریندر مودی نے جو قدم اٹھایا ہے اس کے لئے ہماری حکومت پر عزم ہے۔ اس مرتبہ جو اکثریت این ڈی اے اتحاد کو ملی ہے وہ بچے ہوئے کام پورے کرنے کے لیے ملی ہے۔ ہم نے تعلیم، روزگار، صحت، سڑک، پل پلیا حلقوں میں جو کام کئے ہیں اسے عوام دیکھ رہے، جس وجہ سے ہم پر ایک بار پھر سے بھروسہ کرتے ہوئے اقتدار سونپی ہے۔
اس موقع پر نائب وزیر اعلیٰ کی آمد کو لے کر ٹاؤن ڈی ایس پی پشکر کمار، نگر تھانہ صدر سنیل کمار پولس اہلکار کے ساتھ موجود رہے۔
