اس ضمن میں آج ارریہ کے چاندنی چوک پر مختلف تنظیموں کے کارکنان نے کسانوں کے ساتھ مل کر وزیراعظم نریندر مودی کا پتلا نذر آتش کیا اور مرکزی حکومت کے خلاف جم کر نعرہ بازی کرتے ہوئے زرعی قانون کو واپس لیے جانے کا مطالبہ کیا۔
مظاہرین میں کانگریس کے ضلعی ترجمان سبطین احمد، جن جاگرن شکتی یونین کے آشیش رنجن، جن ادھیکار پارٹی کے ضلی صدر امتیاز انیس عرف لڈو، سماجی کارکن فیصل یاسین کے علاوہ درجنوں کسان موجود تھے۔
کانگریس ترجمان سبطین احمد نے کہا کہ مرکزی حکومت کی جانب سے نافذ کیا گیا زرعی قانون کسی بھی طرح کسانوں کے حق میں نہیں ہے، اس قانون سے کسانوں کے اوپر مزید قرض بڑھے گا، آج ہزاروں کی تعداد میں کسان بھائی اپنے حقوق کی بازیابی کے لیے دہلی میں مظاہرہ کررہے ہیں۔لیکن یہ کسان مخالف حکومت ان سے بات تک کرنے کو تیار نہیں ہے، کسان ہی ہمارے ملک کے بنیاد ہیں، اگر ان کے حقوق کو پامال کرنے کی کوشش ہوگی تو اس ملک کا ایک ایک شہری کسان کے شانہ بشانہ نظر آئے گا، ہم اس قانون کی مخالفت اس وقت تک کرتے رہیں گے جب تک یہ قانون واپس نہ لیا جائے یا اس میں ترمیم نہ ہو ۔
جن جاگرن شکتی یونین کے رکن آشیش رنجن نے کہا کہ مودی حکومت شروع سے ہی کسان مخالف ذہن رکھتی ہے، انہیں کسانوں کے مسائل سے کوئی دلچسپی نہیں، انہیں صرف سرمایہ داروں کی فکر ہے کہ ان کے جیب میں کیسے روپے پہنچے، آج جو کسان بھائی اپنے حق کی آواز بلند کررہے ہیں وہ بالکل درست اور واجب ہے۔ اس حکومت کو دوسری ریاستوں میں انتخاب کی تشہیر کرنے کی فرصت ہے لیکن کسانوں کے مسائل سننے کا وقت نہیں ہے۔ جب تک کسانوں کا مطالبہ پورا نہیں ہو جاتا تب تک یہ تحریک جاری رہے گی۔
