کنہیا کے خلاف امیدوار اتارکر آر جے ڈی نے غلطی کی: دگ وجے

ریاست بہار میں بیگو سرائے سے انتخابی میدان میں اترے کنہیا کمار اس وقت چاروں طرف موضوع بحث ہیں اسی دوران کانگریس کے تجربہ کار سیاسی رہنما دگ وجے سنگھ نے اس تعلق سے بیان دیا ہے۔

مدھیہ پردیش کانگریس کے سینیئر رہنما دگ وجے سنگھ نے کہا ہے کہ وہ کنہیا کمار کے حامی ہیں اور انہیں خوشی ہے کہ انتخابی مہم میں حصہ لینے کے لیے کنہیا بھوپال آرہے ہیں۔

بھوپال پارلیمانی نشست سے کانگریس کے امیدوار دگ وجے سنگھ نے کہا کہ آر جے ڈی نے بیگوسرائے سے کنہیا کمار کے خلاف امیدوار اتار کر بہت بڑی غلطی کی ہے۔

انہوں نے کہ عظیم اتحاد کی جانب سے بیگوسرائے پارلیمانی نشست سی پی آئی کے لیے چھوڑنے کی وکالت کی تھی۔

واضح رہے کہ جے این یو طلبا یونین کے سابق صدر کنہیا کمار کو سی پی آئی نے بیگوسرائے سے اپنا امیدوار بنایا ہے جبکہ ان کے خلاف بی جے پی نے مرکزی وزیر گری راج سنگھ کو ٹکٹ دیا ہے اور آر جے ڈی نے تنویر حسن کو میدان میں اتارا ہے۔

اس کے ساتھ ہی بیگو سرائے کا انتخاب سہ رخی ہوگیا ہے ۔ اس ہائی پروفائل سیٹ پر ملک بھر کی نگاہیں مرکوز ہیں جہاں 29 تاریخ کو الیکشن ہونا ہے۔