ٹرین سے اتارے گئے بچوں کا تعلق بھاگلپور کے مادھوپور مسلم محلے سے ہے۔
بچوں کے اتار لیے جانے کے بعد ان کے سرپرست پریشان ہیں اور اپنے بچوں کی بحفاظت واپسی کا انتظار کر رہے ہیں۔
ان کا کہنا گزشتہ کی طرح اس برس بھی عید کی چھٹیاں گزارنے کے بعد ان کے بچے اپنے استاد کے ساتھ تعلیم کے سلسلے میں مہاراشٹر میں واقع اصحاب صفہ نامی مدرسے میں جارہے تھے، لیکن شک کی بنیاد پر جی آر پی نے ان لوگوں کو ٹرین سے اتار لیا۔
بچوں کے والدین کا کہنا ہے کہ ان کے بچے تو معمول کے مطابق ہر سال کی طرح امسال بھی تعلیم حاصل کرنے کے لیے جارہے تھے، لہذا اس طرح دھر پکڑ کرنے کا مطلب کہیں بچوں اور ان کے سرپرستوں کو ہراساں کرنا تو نہیں ہے؟
واضح رہے کہ چند روز قبل بھی اترپردیش کے اناؤ سے بھی اسی طرح 30 بچوں کو حراست میں لیا گیا تھا اور یہ افواہ پھیلائی گئی تھی کہ یہ انسانی اسمگلنگ کا معاملہ ہے لیکن بعد میں جمعیت العماء ہند کی مداخلت کے بعد ان بچوں کو چھوڑا گیا۔
