ضلع کے کنزر ٹاؤن میں کورونا وائرس کے بڑھتے معاملات کو دیکھتے ہوئے انتظامیہ نے آج مذکورہ علاقہ کو ریڈ زون قرار دیا ہے اور پورے علاقے کو سیل کر دیا ہے۔
مذکورہ علاقے میں آج ایک مقامی دکاندار کا ٹیسٹ مثبت پایا گیا جس کی وجہ سے پورے علاقے میں تشویش کی لہر دوڑ گئی۔
وہیں ضلع میں کورونا وائرس کے مریضوں کی تعداد میں ہو رہے اضافہ کو لے کر انتظامیہ کی جانب سے عائد کی گئی پابندیوں کو مزید سخت کیا گیا ہے۔
اس دوران تحصیل کنزر کے کئی مقامات پر متعدد ناکے لگائے گیے ہیں، جہاں سیکیورٹی فورسز کی اضافی نفری کو تعینات کیا گیا گیا ہے۔ٹاؤن کے میونسپل کمیٹی کے چیئرمین کا کہنا تھا کہ ٹاؤن کے کئی دکانداروں کے ٹیسٹ کیے گئے جن میں سے ایک کا ٹیسٹ مثبت آیا ہے، جس کے بعد علاقے میں میونسپل اہلکار مزید متحرک ہو گئے ہیں اور جگہ جگہ سینٹائز کیا جا رہا ہے۔
وہی تحصیل دار کنزر نے لوگوں سے اپیل کی کہ وہ ہر حال میں سماجی دوری اختیار کریں اور سرکاری حکمنامے کی پاسداری کو یقینی بنائیں، تاکہ اس مہلک وبا کو مزید پھیلنے سے روکا جا سکے۔
