شمالی کشمیر کے ضلع بارہمولہ کے کریری میں پیر کو عسکریت پسندوں کے سکیورٹی فورسز کی مشترکہ پارٹی پر حملے کے بعد طرفین کے درمیان ہونے والے مسلح تصادم میں منگل کو ایک اور عسکریت پسند مارا گیا جس کے ساتھ ہلاک شدہ عسکریت پسندوں کی تعداد بڑھ کر تین ہوگئی ہے۔
پیر کو عسکریت پسندوں کے حملے اور اس کے بعد علاقے میں چھڑنے والے تصادم میں پانچ سکیورٹی فورسز اہلکاروں اور دو عسکریت پسندوں سمیت سات افراد مارے گئے تھے۔ ہلاک شدہ سکیورٹی فورسز اہلکاروں میں سی آر پی ایف اور فوج کے دو دو اہلکار اور جموں و کشمیر پولیس کا ایک ایس پی او شامل ہیں۔
کشمیر زون پولیس نے کریری تصادم میں ایک اور عسکریت پسند کے مارے جانے کی تصدیق کی ہے۔
اس سلسلے میں ایک ٹویٹ میں کہا گیا: 'کریری انکاؤنٹر اپڈیٹ: ایک اور عسکریت پسند مارا گیا۔ ہلاک ہونے والے عسکریت پسندوں کی تعداد بڑھ کر تین ہوگئی۔ ممنوعہ مواد بشمول اسلحہ و گولہ بارود برآمد کیا گیا۔ تلاشی آپریشن جاری ہے'۔
فوج کی طرف سے جاری ایک مختصر بیان میں کہا گیا: 'بارہمولہ میں ایک اور عسکریت پسند مارا گیا جس کے ساتھ مہلوک عسکریت پسندوں کی تعداد تین ہوگئی۔ ان کے قبضے سے ایک اے کے 47 رائفل اور تین پستولیں برآمد کی گئی ہیں۔ دو شدید زخمی فوجی جوان زخموں کی تاب نہ لاتے ہوئے دم توڑ گئے ہیں۔ مشترکہ آپریشن جاری ہے'۔
سرکاری ذرائع نے بتایا کہ پیر کو حملے کے بعد شروع ہونے والے عسکریت پسند مخالف آپریشن میں منگل کو ایک اور عسکریت پسند مارا گیا۔
انہوں نے کہا کہ مذکورہ عسکریت پسند، جو بظاہر غیر ملکی ہے، کو مارنے کے لئے اس کے خفیہ ٹھکانے کو آئی ای ڈی سے اڑایا گیا۔
پولیس نے پیر کے روز مارے گئے عسکریت پسندوں کی شناخت لشکر طبینہ کمانڈر برائے شمالی کشمیر سجاد احمد میر عرف حیدر عرف راجا ساکنہ براٹھ کلان سوپور اور اسی تنظیم کے دوسرے ایک عسکریت پسند عنایت اللہ میر ساکنہ اندرگام پٹن کے بطور کی تھی۔
عسکریت پسندوں کے حملے میں ہلاک ہونے والے سی آر پی ایف اہلکاروں کی شناخت کانسٹیبل لوکیش شرما اور کانسٹیبل خورشید خان ساکنان بہار اور ایس پی او کی شناخت مظفر علی ساکنہ بارہمولہ کے بطور کی گئی تھی۔
