حالیہ برفباری کی وجہ سے شمالی کشمیر کے بارہمولہ ضلع میں تین فٹ سے زیادہ برف جم گئی ہے، جبکہ دور دراز اور بالائی علاقوں میں پانچ سے سات فٹ برف جمی ہوئی ہے۔
شدید برف باری کی وجہ سے شمالی کشمیر کے بارہمولہ اور جموں خطہ کے بانہال کے درمیان چلنے والی ریل خدمات کو بھی معطل کردیا گیا ہے۔
وادی کشمیر میں رواں موسم کی شدید ترین برف باری کے نتیجے میں بجلی کی ترسیل کا نظام بھی متاثر ہوکر رہ گیا ہے۔
اطلاعات کے مطابق وادی کے بیشتر حصے گھپ اندھیرے میں ڈوب گئے ہیں۔ ای ٹی وی بھارت سے بات چیت کرتے ہوئے مقامی لوگوں نے کہا کہ انتظامیہ نے ابھی تک برف ہٹانے کا عمل شروع نہیں کیا ہے۔ وادی میں اس برف باری سے شدید نقصان ہوا ہے جس میں 16 رہائشی مکانات برف کی زد میں آگئے ہیں۔ درجنوں علاقوں کو جانے والی سڑکوں پر سے برف ہٹانے کا کام شروع ہونا ابھی باقی ہے۔
وادی کی بیشتر سڑکوں پر گاڑیوں کی آمدورفت معطل ہوگئی ہے۔ بیشتر علاقوں میں لوگوں کو ٹرانسپورٹ کی عدم دستیابی کی وجہ سے پیدل سفر کرتے ہوئے دیکھا گیا۔ لوگوں نے انتظامیہ سے گزارش کی ہے کہ وہ جلد از جلد سڑکوں سے برف ہٹانے کا کام شروع کردیں۔
دوسری جانب سیاحتی مقام گلمرگ، اور دودھ پتھری میں تین سے چھ فٹ برف جم گئی ہے۔ شعبہ سیاحت سے وابستہ افراد کا کہنا ہے کہ چلہ کلان میں بھاری برف باری ہونے کا فائدہ یہ ہے کہ جمع شدہ برف اپریل تک موجود رہے گی۔
