ضلع بارہمولہ کے سوپور قصبہ میں جمعرات کو غیر مقامی باشندوں میں ڈی سی بارہمولہ کی ہدایت پر اشیاء خوردنی تقسیم کی گئیں۔
اس موقع پر میڈیا کے ساتھ بات کرتے ہوئے تحصیلدار سوپور شبیر احمد کا کہنا تھا کہ ’’لاک ڈاؤن میں پھنسے غیر مقامی باشندوں کو آٹا، نمک، چاول، وغیرہ تقسیم کیا گیا تاکہ انہیں کسی بھی بھی طرح کی پریشانی کا سامنا نہ کرنا پڑے۔‘‘
انہوں نے مزید کہا کہ ضلع انتظامیہ کی جانب سے غیر مقامی باشندوں کو اس سے پہلے بھی راشن فراہم کیا گیا ہے تاہم اس بار ماہ رمضان کے پیش نظر انہیں مہینے بھر کا راشن دیا گیا ہے۔
ضلع انتظامیہ کی جانب سے ڈگری کالج سوپور کے بائز ہوسٹل میں رکھے گئے غیر مقامی باشندوں میں راشن تقسیم کیا گیا۔
واضح رہے کہ کورونا وائرس کے پیش نظر سوپور اور اس کے گرد نواح میں غیر مقامی باشندوں کو مختلف مقامات پر رکھا گیا ہے جنکے کھانے پینے کا انتظام ضلع انتظامیہ کی جانب سے کیا جا رہا ہے۔
