نوگام سوناواری میں لوگ گندہ پانی پینے کے لیے مجبور

شمالی کشمیر کے ضلع بانڈی پورہ کے ایک دور دراز گاؤں نوگام سوناواری میں لوگوں کو پینے کے صاف پانی کی شدید قلت کا سامنا ہے جس کی وجہ سے ان کو کافی مشکلات کا سامنا کرنا پرتا ہے-

مقامی لوگوں کے مطابق کئی ماہ سے انہیں پینے کا صاف پانی میسر نہیں ہے جس کے نتیجے میں وہ گندہ پانی پینے کے لیے مجبور ہیں۔

ان کا کہنا ہے کہ پانی کی عدم دستیابی کی وجہ سے یہاں بیماریاں پھوٹ پڑنے کا بھی اندیشہ ہے کیونکہ علاقے میں لوگوں کو گندہ پانی کھانے پینے کے لئے استعمال کرنا پڑتا ہے۔

مقامی لوگوں نے بتایا کہ انہوں نے متعدد بار اس سلسلے میں انتظامیہ تک اپنے مسائل پہنچائے۔ تاہم انہیں ہمیشہ نظر انداز کیا جاتا ہے۔

ایک مقامی شخص نے بتایا کہ 'اس دور میں پانی جو انسانی زندگی کی ایک بنیادی ضرورت ہے کا نہ ہونا سب سے بڑا المیہ ہے۔ ہماری ماں بہنوں کو پانی لانے کے لئے دور دور تک مسافت طے کرنی پڑتی ہے جو ایک نا انصافی ہے۔'

انہوں نے متعلقہ انتظامیہ سے اس بارے میں ٹھوس اقدامات اٹھانے کی اپیل کی ہے تاکہ یہاں کی بستی کو ان مشکلات سے نجات مل سکے۔