'اگزٹ پولز عوامی نبض پکڑنے میں ناکام رہے'

آندھراپردیش کے وزیراعلی و تلگودیشم پارٹی کے قومی صدر این چندرا بابو نائیڈو نے کہا ہے کہ ایک مرتبہ پھر اگزٹ پولز عوامی نبض کو پکڑنے میں ناکام رہے۔ اگزٹ پولز کئی مواقع پر غلط ثابت ہوچکے ہیں اورزمینی حقیقت سے کافی دور رہے ہیں۔

اس میں کوئی شک نہیں کہ تلگودیشم پارٹی اے پی میں حکومت بنائے گی اور انہیں یقین ہے کہ غیر بی جے پی جماعتیں مرکز میں غیر بی جے پی حکومت تشکیل دیں گی۔

چندرابابونائیڈو نے ٹوئٹ کرتے ہوئے ہر پولنگ اسٹیشن کے تقریبا 50 فیصد وی وی پیٹ کی گنتی کے لیے الیکشن کمیشن سے کیے گئے اپنے مطالبہ کا اعادہ کیا۔

انہوں نے کہاکہ گنتی کے عمل کی شروعات کے موقع پر ہر اسمبلی حلقہ کے پانچ بوتھز میں وی وی پیٹ کی گنتی کی جانی چاہیے۔کسی بھی قسم کے نقائص پر اسمبلی حلقے کے تمام وی وی پیٹ کی گنتی کی جانی چاہیے۔