مندر سے 3 لاشیں برآمد، انسانی بلی کا شبہ

ریاست آندھراپردیش کے ضلع اننت پور میں ایک زیرتعمیر مندر میں تین افراد کی لاشیں برآمد ہوئی ہیں۔

اننت پور کی مندر سے 3 افراد کی سربریدہ لاشوں کو برآمد کیا گیا جن کی شناخت 70 برس کے پجاری شیوارامی ریڈی، اس کی 75 برس کی بہن کڑپالا کامالاماں اور 70 برس کے ستیہ لکشمی اماں کی حیثیت سے کی گئی۔
کورتی کوٹا گاؤں میں واقع مندر کے احاطہ میں خون میں لت پت تین لاشوںکو دیکھ کر علاقہ میں تشویش کی لہر دوڑ گئی۔
مندر کے اندر موجود ایک مجسمہ پر بھی خون کے دھبے دیکھے گئے۔

ایسا مانا جارہا ہے کہ مندر میں ان تینوں کی انسانی بلی چڑھائی گئی ہوگی۔اس سلسلہ میں پولیس مصروف تحقیقات ہے۔کدیری کے انسپکٹر ٹی مدھو نے بتایا کہ مندر کی صفائی کی جارہی ہے۔ انہوں نے تین افراد کے قتل کی واردات میں چار تا پانچ افراد کے ملوث ہونے کا امکان ظاہر کیا ہے۔اس کیس میں ابھی تک کسی کو گرفتار نہیں کیا گیا۔