مرہامہ حملہ: علاقہ میں سرچ آپریشن جاری

سیکیورٹی فورسز نے ایک وسیع علاقہ کو محاصرے میں لیا ہے اور حملے کے بعد فرار ہوئے عسکریت پسندوں کی تلاش شروع کر دی ہے۔

جنوبی ضلع اننت ناگ کے مرہامہ علاقہ میں عسکریت پسندوں کی تلاش ابھی جاری ہے۔ اس سے قبل آج دوپہر عسکریت پسندوں نے مرہامہ علاقہ میں فوج کی 3 راشٹریہ رائفلز کی گشتی پارٹی پر فائرنگ کی تھی۔ جس کے بعد فورسز نے علاقہ کا محاصرہ کرکے حملہ آوروں کی تلاش شروع کی۔ تاہم ابھی تک عسکریت پسندوں اور سکیورٹی فورسز کا آمنا سامنا نہیں ہوا اور علاقہ میں سرچ آپریشن جاری ہے۔

دراصل آج جی او سی وکٹر فورس راشم بالی 3 آر آر کے مختلف فوجی کیمپس کا جائزہ لینے آئے تھے۔ جس دوران انہوں نے کیمپس پر کئی عوامی وفود سے بھی ملاقات کی۔ اسی تناظر میں آس پاس کے علاقوں میں فوج کی تعیناتی عمل میں لائی گئی تھی۔

گشت پر مامور فوجی اہلکار جوں ہی واپس نکلنے لگے تو طاق میں بیٹھے عسکریت پسندوں نے ان پر فائرنگ کی اور فرار ہوگئے۔ تاہم اس حملہ میں کوئی جانی نقصان نہیں ہوا ہے۔