وادی کے مختلف علاقوں کے ساتھ ساتھ ضلع اننت ناگ میں آج دوپہر چلہ خورد کی پہلی جبکہ موسم سرما کی تیسری برفباری کا سلسلہ شروع ہو گیا ہے۔
پہاڑی علاقوں میں بھاری جبکہ میدانی علاقوں میں درمیانی درجہ کی برفباری ہو رہی ہے۔ برفباری کے دوران معمولات زندگی کو بحال رکھنے کے لیے انتظامیہ کی جانب سے عملہ اور مشینریز کو تیار رکھا گیا ہے تاکہ برفباری کی وجہ سے پیدا شدہ کسی بھی صورتحال سے بروقت نمٹا جا سکے۔
اننت ناگ میں دوپہر کے بعد برفباری کا سلسلہ شروع ہو گیا۔ مختلف بازاروں میں روزمرہ کے کام کاج کے سلسلہ میں نکلے لوگ خاص کر طلبا اپنے گھروں کی جانب رخ کرتے نظر آئے۔
تازہ برفباری سے وادی بالخصوص دیہی علاقوں کی سڑکوں پر پھسلن پیدا ہوئی تھی جس کی وجہ سے ٹرانسپورٹ کی نقل و حمل صبح کے وقت متاثر ہوئی لیکن ٹھٹھرتی سردیوں سے لوگوں کو قدر راحت نصیب ہوئی۔
وادی کے معروف سیاحتی مقام پہلگام میں کم سے کم درجہ حرارت منفی 3.9 ڈگری سینٹی گریڈ ریکارڈ کیا گیا جہاں گزشتہ شب کا کم سے کم درجہ حرارت منفی 9.3 ڈگری سینٹی گریڈ ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی 5.2 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی 7.0 ڈگری سینٹی گریڈ ریکارڈ ہوا تھا۔
