اترپردیش کے ضلع بلند شہر کے سکندرآباد علاقہ میں واقع پچوتہ گاؤں کے رہائشی انٹرنیشنل باکسر ستیش یادو نے جمعرات کے روز ٹوکیو اولمپکس میں پہلا میچ جیت کر کوارٹر فائنل میں جگہ بنا لی ہے۔ ستیش کی کامیابی سے اس کے خاندان سمیت پورے گاؤں میں جشن کا ماحول ہے۔ سب کو یقین ہے کہ اب ستیش یادو طلائی کا تمغہ جیتنے کے بعد ہی بھارت آئیں گے۔
ستیش کا میچ دیکھنے کے لئے پورا گاؤں جمعرات کی صبح سے ہی ستیش کے گھر پر جمع تھا۔ لوگ اپنی نگاہوں سے ستیش کا میچ دیکھ رہے تھے۔ جیسے ہی ستیش کا کوارٹر فائنل میں جانے کا اعلان ہوا، لوگوں میں خوشی کی لہر دوڑ گئی۔
اس سے قبل ستیش نے کئی بین الاقوامی مقابلوں میں ملک کا پرچم بلند کیا ہے۔ انہوں نے 2014 میں ایشین گیمز میں کانسی کا تمغہ، 2015 میں بنکاک ایشین چیمپیئن شپ میں کانسی کا تمغہ ، 2018 کامن ویلتھ گیمس میں چاندی کا تمغہ اور 2019 میں بنکاک میں ہوئی ایشین چیمپیئن شپ میں کانسی کا تمغہ جیتا تھا۔ تاہم حال ہی میں چوٹ کی وجہ سے ستیش جرمنی میں ہوئے کولوگن باکسنگ ورلڈ کپ میں طلائی تمغہ جیتنے سے محروم ہوگئے تھے۔
ملک اور بیرون ممالک میں بھارت کا پرچم بلند کرنے والے ستیش کو حکومت ہند نے ارجن ایوارڈ سے بھی نوازا ہے، اب ہر ایک کو امید ہے کہ ستیش ٹوکیو اولمپکس میں طلائی کا تمغہ جیت کر، نہ صرف گاؤں بلکہ ضلع ، ریاست کے ساتھ ساتھ پورے ملک کا نام روشن کرے گا۔
مزید پڑھیں:
معلوم ہوکہ بھارتی باکسر ستیش کمار (91 کلوگرام پلس) نے اولمپکس کے پہلے میچ میں جمیکا کے رکارڈو براؤن کو سکشت دے کر کوارٹر فائنل میں جگہ بنا لیا ہے۔ ان دونوں باکسرز کے لئے یہ پہلا اولمپکس ہے۔ اب ستیش کا مقابلہ ازبکستان کے بخودیر جالولوو سے ہوگا، جو ایشین چیمپیئن ہے۔
