ممبئی: ویمنز پریمیئر لیگ (ڈبلیو پی ایل) کی دو مضبوط ٹیمیں دہلی کیپٹلز اور ممبئی انڈینز ٹورنامنٹ کا پہلا خطاب جیتنے کے لیے اتوار کو بریبورن اسٹیڈیم میں آمنے سامنے ہوں گی۔ جہاں میگ لیننگ کی دہلی کیپٹلس نے پوائنٹس ٹیبل پر سرفہرست رہ کر سیدھے فائنل میں جگہ بنائی، وہیں ممبئی نے ایلیمینیٹر میں یوپی واریرز کو شکست دے کر فائنل میں اپنا سفر مکمل کیا۔ ڈبلیو پی ایل میں سب سے زیادہ اسکور کرنے والی کیپٹلز کی طاقت ان کی بیٹنگ رہی ہے اور کپتان لیننگ نے اورنج کیپ پہن کر صحیح معنوں میں ٹیم کی قیادت کی ہے۔ کیپٹلس جو بھلے ہی لیگ اسٹیج میں ممبئی اور گجرات جائنٹس سے ہار کا سامنا کرنا پڑا ہو ، لیکن فائنل میں پہنچنے کے راستے میں یہ دو معمولی جھٹکے تھے۔
دوسری جانب ممبئی نے 143 رنز کی شاندار جیت کے ساتھ ٹورنامنٹ میں اپنا ڈیبیو کیا۔ ایک موقع پر ایسا لگ رہا تھا کہ غیر مفتوح ممبئی سیدھے فائنل میں جگہ بنا لیں گی، لیکن لیگ مرحلے میں دو ہارنے کے بعد انہیں ایلیمینیٹر سے گزرنا پڑا۔ ہرمن پریت کور کے ٹیم نے دکھایا کہ وہ پہلے دن سے ہی ڈبلیو پی ایل چیمپئن بننے کے لیے کیوں فیورٹ تھی جب انہوں نے ایلیمینیٹر میں واریرز کو 72 رنز سے شکست دی۔ بریبورن اسٹیڈیم میں خطابی مقابلے میں ممبئی کے سامنے سب سے بڑا چیلنج لیننگ کی کپتانی کا ہوگا۔ پانچ بار ٹی 20 ورلڈ کپ جیتنے کے بعد، لیننگ بین الاقوامی کرکٹ میں سب سے کامیاب کپتان ہیں اور یقینی طور پر ڈبلیو پی ایل ٹرافی اٹھانا چاہیں گی۔ کیپٹلز کے پاس دھماکہ خیز اوپنرز شیفالی ورما اور ایلس کیپسی ہیں جو بیٹنگ میں لیننگ کو سپورٹ کرتی ہیں۔ اس کے علاوہ تجربہ کار آل راؤنڈر ماریزان کپ بھی گھریلو کراؤڈ کے سامنے ممبئی کی جیت کی امیدوں کو خراب کر سکتی ہیں۔
کاپ نے اب تک ٹورنامنٹ کے آٹھ میچوں میں 159 رنز بنانے کے علاوہ نو وکٹ حاصل کئے ہیں۔ جہاں دہلی کے شائقین کی نگاہیں کاپ پر ہوں گی، وہیں ممبئی کے شائقین نیٹ سیور برنٹ سے اپنی امیدیں باندھ رہے ہوں گے۔ ہرمن پریت کو پہلے دو میچوں میں نصف سنچریاں بنانے کے بعد بھلے ہی فارم نہ ملی ہو، لیکن سیور برنٹ نے اپنی مسلسل آل راؤنڈ کارکردگی سے ممبئی کو مشکلات سے نکالا ہے۔ ایلیمینیٹر میں بھی جب ممبئی کی اننگز ابتدائی دھچکوں کے بعد سست ہوئی تو یہ سیور برنٹ ہی تھیں جنہوں نے 38 گیندوں پر 72 رنز کی دھماکہ خیز اننگز کھیل کر فتح کی بنیاد رکھی۔
یہ بھی پڑھیں: Alyssa Healy on Eliminator Match شیور برنٹ کا کیچ نہ چھوڑتے تو شاید میچ کا نتیجہ کچھ اور ہوتا، ایلیسا ہیلی
سیور برنٹ کے علاوہ، ممبئی کے پاس ہیلی میتھیوز اور امیلیا کیر جیسی آل راؤنڈر ہیں جو گیند اور بلے دونوں سے میچ کا رخ موڑنے کی صلاحیت رکھتی ہیں۔ ٹورنامنٹ کی کامیاب ترین بالر سائقہ اسحاق اور ایلیمینیٹر میں ہیٹ ٹرک کرنے والی ایزی وونگ کے ساتھ لیس بالنگ اٹیک کسی بھی ٹیم کو اپنے دن پر ہلا کر رکھ سکتا ہے۔ ممبئی نے بریبورن اسٹیڈیم میں اپنے تینوں میچ جیتے ہیں، جب کہ کیپٹلس کو ایک جیت اور ایک میں شکست ہوئی ہے۔ دونوں ٹیمیں لیگ مرحلے میں ایک بار ایک دوسرے کو شکست دے چکی ہیں۔ جو بھی ٹیم ڈبلیو پی ایل کا خطاب جیتے گی، یہ خواتین کرکٹ کے لیے یقیناً ایک تاریخی لمحہ ہوگا۔
دہلی کیپٹل ٹیم: میگ لیننگ (کپتان)، جمائما روڈریگس (نائب کپتان)، شفالی ورما، ایلیس کیپسی، رادھا یادو، شیکھا پانڈے، ماریزانے کاپ، تیتاس سدھو، لورا ہیرس، تارا نورس، جسیہ اختر، منو مانی، تانیا بھاٹیہ (وکٹ کیپر)، پونم یادو، جیس جانسن، سنیہا دیپتی، اروندھتی ریڈی، اپرنا منڈل۔
ممبئی انڈینز ٹیم: ہرمن پریت کور (کپتان)، نیٹ سیور برنٹ، امیلیا کیر، پوجا وستراکر، یاستیکا بھاٹیہ (وکٹ)، ہیدر گراہم، ایزی وونگ، امن جوت کور، دھارا گجر، سائقہ اسحاق، ہیلی میتھیوز، چلو ٹریون، ہمیرا قاضی ، کومل جنجد، پریانکا بالا، سونم یادیو، نیلم بشت، جنتامنی کلیتا۔
یو این آئی
