دہلی کیپیٹلز نے ٹاس جیتنے کے بعد رائل چیلینجرز بنگلور کو بلے بازی کی دعوت دی تھی جس کے بعد بنگلور نے اے بی ڈی ویلیئرز کی ذمہ دارانہ نصف سنچری کی بدولت 171 رنز بنائے۔ ڈی ویلیئرز نے 42 گیندوں میں 75 رنوں کی اننگ کھیلی۔
بنگلور کی جانب سے رواں آئی پی ایل کی اب تک کی سب سے بہترین سلامی جوڑی وراٹ کوہلی اور دیودت پڈیکل نے اننگ کا آغاز کیا لیکن اس میچ میں یہ جوڑی ناکام ہوگئی اور 30 رنز کے مجموعی اسکور پر دونوں کھلاڑی آؤٹ ہوگئے۔
کپتان وراٹ کوہلی نے 11 گیندوں میں 2 چوکوں کی مدد سے 12 رنز جبکہ پڈیکل نے 14 گیندوں میں 3 چوکوں کی مدد سے 17 رنز بنائے۔ ان دونوں کے آؤٹ ہونے کے بعد تمام امیدیں گلین میکسویل اور اے بی ڈی ویلیئرز سے وابستہ تھیں۔ کریز پر آتے ہی میکسویل نے بڑے شاٹس لگانے شروع کئے لیکن تیزی سے رنز بنانے کی کوشش میں آؤٹ ہوگئے، انہوں نے 20 گیندوں میں ایک چوکا اور 2 چھکوں کی مدد سے 25 رنز بنائے۔
میکسویل کے آؤٹ ہونے کے بعد ڈی ویلیئرز نے محاذ سنبھالا اور رجت پاٹیدار کے ساتھ مل کر 54 رنز کی پارٹنرشپ کی۔ اس دوران رجت نے جارحانہ بلے بازی کی اور 22 گیندوں میں 2 چھکوں کی مدد سے 31 رنز بنائے۔
اس دوران ڈی ویلیئرز کریز پر ڈٹے رہے اور آخری اوورز میں جارحانہ بلے بازی کرتے ہوئے ٹیم کو باعزت اسکور تک پہنچایا۔ انہوں نے 42 گیندوں میں 75 رنوں کی جارحانہ اننگ کھیلی، اس دوران انہوں نے 3 چوکے اور 5 چھکے لگائے۔
دہلی کی جانب سے ایشانت شرما، کگیسو رباڈا، اویس خان، امت مشرا، اور اکشر پٹیل نے ایک ایک وکٹ حاصل کئے۔
