جنوبی افریقہ کے تیز گیندباز لُنگی انگڈی (4 وکٹ) اور لوتھو سیپاملا (3 وکٹ) کی شاندار گیند بازی اور اوپنر ایڈین مارکرم کی ناٹ آؤٹ 36 رنز اور ڈین ایلگر کی ناٹ آؤٹ 31 رنز کی بدولت جنوبی افریقہ نے دوسرے ٹیسٹ کے تیسرے دن سری لنکا کو 10 وکٹوں سے شکست دے کر دو میچوں کی ٹیسٹ سیریز میں 2-0 سے کلین سوئپ کر دیا۔
دو ٹیسٹ میچز کی سیریز 2-0 سے جیتنے سے جنوبی افریقہ آئی سی سی ٹیسٹ چیمپئن شپ پوائنٹس ٹیبل میں 120 پوائنٹس ملے جس سے اس کے 204 پوائنٹس ہوگئے اور وہ ٹیبل میں پانچویں نمبر پر ہے۔
سری لنکا نے دوسری اننگ میں کپتان دِمُتھ کرونا رتنے کی 128 گیندوں میں 19 چوکوں کی مدد سے 103 رن کی بدولت 211 رنز بنائے اور جنوبی افریقہ کو محض 67 رنز کا ہدف دیا تھا۔
ہدف کے تعاقب میں جنوبی افریقہ نے بغیر کسی وکٹ کھوئے 13.2 اوور میں 67 رنز بنا کر میچ اور سیریز دونوں اپنے نام کر لی۔
جنوبی افریقہ کی جانب سے ایڈین مارکرم نے 53 گیندوں میں 4 چوکوں کی مدد سے ناٹ آؤٹ 36 رنز اور ڈین ایلگر نے 27 گیندوں میں 5 چوکوں کی مدد سے ناٹ آؤٹ 31 رنز بنائے۔
سیریز میں بہترین کارکردگی کا مظاہرہ کرنے پر ڈین ایلگر کو پلیئر آف دی میچ ایوارڈ کے ساتھ ساتھ پلیئر آف دی سیریز کا ایوارڈ بھی دیا گیا۔ جنوبی افریقہ نے سری لنکا کو پہلے ٹیسٹ میں اننگز اور 45 رنوں سے شکست دی تھی۔
یہ بھی پڑھیں: کے ایل راہل ٹیسٹ سیریز سے باہر
اس سے قبل سری لنکا نے تیسرے دن 4 وکٹ 150 رن سے آگے کھیلنا شروع کیا لیکن کپتان کرونا رتنے کے علاوہ اس کا کوئی بھی بلے باز بڑی اننگز نہیں کھیل سکا۔
تاہم کرونا رتنے نے ایک جانب سے محاذ سنبھالا اور اکیلے مزاحمت جاری رکھی اور ٹیم کو اننگز کی شکست کی شرمندگی سے بچایا۔ کرونا رتنے نے 123 گیندوں میں 10 ویں ٹیسٹ سنچری اسکور کی۔
ایک جانب کرونا رتنے سری لنکن اننگز کو سنبھالنے کی کوشش کی وہیں جنوبی افریقی تیز گیند باز لُنگی انگڈی اور سیپاملا نے قہر ڈھاتے ہوئے سری لنکن اننگز کو تباہ کردیا۔
سری لنکا کی اننگز میں کرونا رتنے کے علاوہ وکٹ کیپر بلے باز نیروشن ڈِکویلا نے 68 گیندوں میں 6 چوکوں کی مدد سے 36 رنز بنائے۔ اس کے علاوہ لاہیرو تھریمانے نے 57 گیندوں پر 7 چوکوں کی مدد سے 31 رنز اور وانندو ہسارنگا نے 32 گیندوں میں 2 چوکوں کی مدد سے 16 رنز بنائے۔
جنوبی افریقہ کی جانب سے لُنگی انگڈی نے 4 وکٹیں حاصل کیں جبکہ سیپاملا نے تین بلے بازوں کو پویلین کی راہ دکھائی اس کے علاوہ اینرک نورکیا 2 اور ویان مولڈر نے ایک وکٹ حاصل کی۔
