کوچ کی سفارشات پر عمل نہ ہو تو عہدے کا کوئی فائدہ نہیں: وسیم جعفر

وسیم جعفر نے کہا کہ ٹیم سلیکشن میں انتظامیہ کی غیر ضروری مداخلت کے سبب وہ ہیڈ کوچ کے عہدے سے مستعفی ہوئے۔

اتراکھنڈ رنجی ٹیم کے ہیڈ کوچ اور بھارت کے سابق مایہ ناز کرکٹر وسیم جعفر نے اپنے خط میں اتراکھنڈ کرکٹ ایسوسی ایشن کے عہدیداران پر الزام عائد کیا کہ افسران نااہل کھلاڑیوں کو ٹیم میں شامل کرنے کا دباؤ بنا رہے ہیں۔

وسیم جعفر کے مستعفی ہونے کے بعد اتراکھنڈ کرکٹ ایسوسی ایشن کے سکریٹری نے کہا کہ انہیں ٹیم کے ارکان سے اطلاع ملی کہ جعفر ڈریسنگ روم میں فرقہ واریت کو فروغ دینے جیسی بات کرتے ہیں اور مسلم کھلاڑیوں کو آگے بڑھا رہے ہیں۔

وسیم جعفر نے اپنے اوپر عائد تمام الزامات کی تردید کرتے ہوئے کہا کہ اگر وہ فرقہ پرست ہوتے تو انہیں عہدے سے برخاست کیا جاتا نہ کہ وہ خود مستعفی ہوتے۔