آئی پی ایل کا انعقاد 19 ستمبر سے 10 نومبر تک متحدہ عرب امارات میں ہونے والا ہے اور یہ ٹورنامنٹ بائیو سیکیور پروٹوکول کے تحت ہوگا اورسکیورٹی نیز حفاظتی انتظامات کی وجہ سے ٹورنامنٹ میں شائقین نہیں ہوں گے۔
سابق کرکٹر وی وی ایس لکشمن نے اپنی فرنچائزی کے ذریعہ جاری کردہ ویڈیو میں کہا کہ 'میں کرکٹ کے تمام شائقین کو یقین دلاتا ہوں کہ وہ میدان میں تماشائی نہ ہونے کے باوجود بہترین انداز میں اس سے لطف اندوز ہوں گے۔ شائقین کو یہ نہیں سوچنا چاہیے کہ ناظرین کے بغیر کھیلنا کرکٹ کا معیار کم کردے گا۔
انہوں نے کہا کہ شاید پچ تھوڑی سست ہے لیکن ہمیں انتظار کرنا پڑے گا کیونکہ گراؤنڈ عملہ کی کاوشیں ہمیں حیرت میں ڈال سکتی ہیں۔ وہاں کا آؤٹ فیلڈ بہترین ہے لیکن پچ سست ہوسکتی ہے۔ مجھے امید ہے کہ گراؤنڈ عملہ اس کی دیکھ بھال کرے گا۔
آئی پی ایل کے اس سیزن کے لئے کھلاڑیوں کی بولی میں سن رائزرس کی توجہ بھارت کے نوجوان مڈل آرڈر بیٹسمین پر مرکوز تھی۔ انہوں نے دیگر کھلاڑیوں جیسے پریم گرگ، عبد الصمد، وراٹ سنگھ اور بی سندیپ کو ٹیم میں شامل کیا۔
لکشمن نے مزید کہا کہ کھلاڑیوں کی نیلامی میں نوجوانوں کو ٹیم میں شامل کرنا ایک شعوری کوشش تھی۔ جوان ہونے کے ناطے ان کھلاڑیوں نے ڈومیسٹک کرکٹ میں عمدہ کارکردگی کا مظاہرہ کیا۔ اگر آپ ہماری ٹیم کو دیکھیں تو ہماری ٹیم کے پاس بھارت اور بیرون ممالک سے بہت سے تجربہ کار کھلاڑی موجود ہیں۔
انہوں نے کہا کہ 'جب آپ گھریلو کھلاڑیوں کی طرف دیکھیں تو ہمیں ٹیم کی بیٹنگ کو مضبوط کرنے کی ضرورت تھی خاص طور پر مڈل آرڈر میں لہذا ہم نے پچھلے سیزن سے بہتر کارکردگی کا مظاہرہ کرنے والے کھلاڑیوں کا انتخاب کیا۔
