محمد اظہرالدین نے کہا کہ رشبھ پنت نے گزشتہ کچھ مہینوں میں تمام فارمیٹ بہترین کارکرگی سے خود کو ثابت کیا ہے اور وہ مستقبل میں بھارتی ٹیم کی قیادت کرنے کے دعویداروں میں شامل ہوں گے۔
رشبھ پنت آئی پی ایل کے 14 ویں سیزن میں دہلی کیپیٹلز کی کپتانی کریں گے۔ شریس ایر کے زخمی ہونے کی وجہ سے پنت کو ٹیم کی کمان سونپی گئی ہے۔
سابق کپتان محمد اظہرالدین نے ٹویٹ کیا کہ 'پچھلے کچھ مہینوں میں رشبھ پنت کا پرفارمنس بہت اچھا رہا ہے، انہوں نے تمام فارمیٹ میں اپنے آپ کو ثابت کیا ہے۔ اگر سلیکٹرز انہیں مستقبل میں بھارتی ٹیم کی کپتانی کے دعویداروں میں صف اول میں پاتے ہیں تو یہ حیرت کی بات نہیں ہوگی۔ ان کی جارحانہ کرکٹ سے آنے والے وقت میں بھارت کو فائدہ ہوگا۔
پنت نے آسٹریلیا کے خلاف بارڈر گاؤسکر ٹرافی کے تیسرے اور چوتھے ٹیسٹ میچ میں 97 رنز اور ناٹ آؤٹ 89 رنز بنا کر ٹیم 1-2 سے سیریز جیتنے میں اہم کردار ادا کیا تھا۔ اس کے بعد انگلینڈ کے خلاف چوتھے ٹیسٹ میں سنچری بنائی جبکہ یک روزہ سیریز میں بھی رشبھ نے لگاتار میچوں میں نصف سنچری اسکور کی تھی۔
