انڈیا اے اور انڈیا انڈر 19 ٹیم کے کوچ راہل دراوڈ نئی نسل کی صلاحیتوں کو نکھارنے کا کام کریں گے ساتھ ہی جونیئر ٹیم کے لیے حکمت عملی تیار کریں گے۔
تفصیلات کے مطابق راہل دراوڈ خواتین کرکٹ کی کارکردگی کا جائزہ لیں گے اس کے علاوہ دراوڈ علاقائی کرکٹ اکیڈمیز کے کوچنگ اسٹاف کی تقرری بھی کریں گے جبکہ زخمی کھلاڑیوں کے لیے ری ہیب پروگرام کی نگرانی کریں گے۔
ان نئی ذمہ داریوں کا مطلبیہ ہوا کہ دراوڈ اب انڈیا اے اور انڈر 19 ٹیم کے ساتھ سفر نہیں کر سکیں گے بلکہ سابق کھلاڑی پارس مہامبرے اور ابھے شرما ٹیم اسٹاف کی مدد کریں گے۔
گزشتہ روز بی سی سی آئی کی میٹنگ کے بعد کے ایک افسر نے کہا کہ راہل دراوڈ انڈر 19 اور انڈیا اے ٹیم کے ساتھ سفر کریں گے لیکن پورے دورے کےلیے وہ ٹیم کے ساتھ نہیں رہیں گے کیوں کہ این سی اے کی ذمہ داری کافی بڑی ہے اور انہیں زیادہ وقت این سی اے کے لیے ہی دینا ہے۔
انہوں نے کہا کہ مہامبرے اور ابھے شرما انڈیا اے اور انڈر 19 ٹیم کے ساتھ رہیں گے۔
اس میٹنگ میں میں بی سی سی آئی کے اخلاقی افسر اور سپریم کورٹ کے سابق جج ڈی کے جین کے وی وی ایس لکشمن اور سورو گنگولی پر دیے گئے حکم کے تناظر میں موجودہ اور سابق کھلاڑیوں کے مفادات کے ٹكراؤ سے متعلق مسائل پر بھی گفتگو کی گئی۔
بی سی سی آئی کو جین کے حکم کو نافذ کرنا ہوگا لیکن بورڈ اس پر فیصلہ لینے میں جلدی نہیں کرنا چاہتا، بی سی سی آئی افسر نے کہا کہ ہم حکم کا جائزہ لیں گے اور قانونی ٹیم کی رائے بھی لیں گے، اس وقت یہ کہنا مشکل ہے کہ ہم اس پر فیصلہ کب کریں گے۔
