بھارتی کرکٹ ٹیم کے تیز گیند باز ایشانت شرما کے زخمی ہونے سے آئندہ نیوزی لینڈ کے دورے کے لیے بھارتی ٹیم کو جھٹکا لگا ہے۔
ودربھ کے خلاف رنجی ٹرافی میچ میں ایشانت شرما کو ٹخنے میں چوٹ لگی جس کے بعد وہ میدان سے باہر چلے گئے۔
واضح رہے کہ اس سے قبل وکٹ کیپر بلے باز رشبھ پنت اور سلامی بلے باز شکھر دھون بھی زخمی ہونے کی وجہ سے میدان سے باہر ہوگئے ہیں۔
ایشانت ودربھ کے خلاف میچ کے دوسرے دن دوسری اننگز کے دوران اپنے تیسرے اوور میں اپنا ٹخنہ زخمی کر بیٹھے، ایل بی ڈبلیو کی اپیل کے دوران ان کا پیر مڑ گیا جس کے بعد وہ میدان سے باہر چلے گئے۔
تفصیلات کے مطابق ان کے ٹخنے میں سوجن آگئی ہے اور ان کی طبی جانچ جاری ہے۔
اس چوٹ کی وجہ سے ایشانت شرما باقی دو دن کے لیے میچ سے باہر ہو گئے ہیں۔
حالاںکہ ٹخنے کی چوٹ سنگین مانی جاتی ہے کیونکہ اس کی وجہ سے کھلاڑی ری ہیبی لٹیشن کے دوران زیادہ حرکت نہیں کر سکتے۔
واضح رہے کہ بھارت کو نیوزی لینڈ کے خلاف ہونے والے پہلے ٹیسٹ سے قبل تین روزہ پریکٹس میچ 14 فروری سے کھیلنا ہے اور ایشانت کے پاس چوٹ سے ابھرنے کے لیے پورے تین ہفتے کا وقت ہے۔
نیوزی لینڈ کے خلاف پہلا ٹیسٹ 21 فروری سے شروع ہوگا اور اس طرح کی چوٹ ٹھیک ہونے میں تقریباً دو ہفتے کا وقت لگتا ہے اگر اس میں کوئی فریکچر نا ہو۔
ایشانت شرما فروری کے پہلے ہفتے میں قومی ٹیم کے ساتھ نیوزی لینڈ کے دورے پر جائیں گے۔
واضح رہے کہ ایشانت شرما کو اپنے 100 ٹیسٹ پورے کرنے کے لیے چار ٹیسٹ میچوں کی ضرورت ہے، ایشانت نے ٹیسٹ میچوں میں حال میں جسپريت بمراه اور محمد سمیع کے ساتھ بہت شاندار کارکردگی کا مظاہرہ کیا ہے جس سے بھارتی ٹیم کا تیز گیند بازی شعبہ مزید مضبوط ہوگیا ہے۔
