آسٹریلیا نے اسٹیو اسمتھ کی شاندار سنچری اور مرنس لابیوشین کی نصف سنچری کی بدولت 9 وکٹوں کے نقصان پر 286 رنز بنا کر بھارت کو 287 رنز کا ہدف دیا۔
مہمان ٹیم آسٹریلیا نے ٹاس جیت کر پہلے بلے بازی کا فیصلہ کیا تھا لیکن اس کا یہ فیصلہ اس وقت غلط ثابت ہوا جب بھارت نے اس دونوں سلامی بلے بازوں کو جلد ہی پویلین کی راہ دکھادی۔
پہلے میچ میں شاندار سنچری بنانے والے دونوں سلامی بلے باز اس میچ میں بھی کچھ خاص کمال نہیں دکھا سکے اور سستے میں آؤٹ ہوگئے، ڈیوڈ وارنر نے 3 رنز جبکہ ارون فنچ 19 رنز بنا کر آؤٹ ہوئے۔
اس کے بعد لابیوشین اور اسٹیو اسمتھ نے اننگ کو سنبھالا اور تیسرے وکٹ کے لیے 127 رنز کی شاندار پارٹنرشپ نبھائی۔
لابیوشین نے اس میچ میں اپنے یکروزہ کریئر کی پہلی نصف سنچری مکمل کی، انہوں نے 54 رنز بنائے اور رویندر جڈیجہ کی گیند پر آؤٹ ہوئے اس کے بعد مشیل اسٹارک، الیکس کیری اشٹن ٹرنر اور اشٹن ایگر جلدی جلدی آؤٹ ہوگئے لیکن اسمتھ نے ایک جانب سے ٹیم کو سنبھالے رکھا اور اپنی سنچری مکمل کی۔
اسٹیو اسمتھ نے 132 گیندوں میں 14 چوکوں اور ایک چھکے کی مدد سے 131 رنز بنائے۔
بھارت کی جانب سے محمد سمیع سب سے کامیاب گیبد باز رہے انہوں نے چار وکٹیں حاصل کیں جبکہ رویندر جڈیجہ نے دو بلے بازوں کو پویلین کی راہ دکھائی اس کے علاوہ نودیپ سینی اور کلدیپ یادو کے حصے میں ایک ایک وکٹ آئی۔
