احمدآباد: ریاست گجرات کے ضلع بناسکنٹھا میں بارڈر سیکورٹی فورس کے اہلکاروں نے ایک پاکستانی درانداز کو بین الاقوامی سرحد عبور کرتے ہوئے گرفتار کرلیا ہے۔ بی ایس ایف کے پی آر او نے ایک سرکاری بیان کے مطابق ملزم کی شناخت دیا رام کے نام سے کی گئی ہے جو پاکستان کے صوبہ سندھ کے شہر نگرپارکر کا رہائشی ہے۔ بیان میں مزید کہا گیا کہ 4 اپریل کو بناسکنٹھا ضلع کے نادیشوری میں بی ایس ایف جوانوں نے ایک پاکستانی شہری کو بین الاقوامی سرحد پر لگی رکاوٹیں عبور کرتے ہوئے دیکھا اور جیسے ہی اسے نادیشوری میں سرحدی چوکی کے قریب بیریکیڈ گیٹ پر چڑھتے ہوئے دیکھا گیا تو اسے فوار گرفتار کرلیا گیا، پولیس نے بتایا کہ درانداز سے مزید پوچھ گچھ کی جا رہی ہے۔
واضح رہے کہ دراندازی کا یہ کوئی نیا معاملہ نہیں ہے بلکہ پاکستانی دراندازیوں کو بھارتی حدود میں داخل ہونے کی کوشش کے دوران پکڑے جانے یا گولی مار کر ہلاک کرنے کے ایسے کئی واقعات ماضی میں رپورٹ ہوئے ہیں۔ گزشتہ سال دسمبر میں ایک شخص کو بارڈر سیکورٹی فورس نے گولی مار کر ہلاک کر دیا تھا جب ایک پاکستانی شہری راجستھان کے سرحدی علاقوں سے بھارتی علاقے میں داخل ہونے کی کوشش کی تھی۔ یہ واقعہ راجستھان کے سری گنگا نگر میں ہرمکھ چیک پوسٹ کے قریب 14 ایس گاؤں میں پیش آیا۔ ذرائع نے بتایا کہ اس وقت پاک فوج نے لاش لینے سے انکار کر دیا تھا۔
یہ بھی پڑھیں:
- Infiltrators Arrested in Punjab بی ایس ایف نے پنجاب میں دو پاکستانی درانداز کو گرفتار کیا
- BSF Kills Infiltrator in Rajasthan راجستھان میں سرحد پر پاکستانی درانداز ہلاک
27 اگست کو حکام نے بتایا کہ ایک پاکستانی درانداز کو بارڈر سیکورٹی فورس کے اہلکاروں نے جموں کے ارینا سیکٹر میں بین الاقوامی سرحد کے قریب گرفتار کیا تھا۔ اس سے قبل 25 اگست کو بی ایس ایف جوان نے جموں کے سامبا علاقے میں بین الاقوامی سرحد کے پار منشیات اسمگل کرنے کی کوشش کرنے والے ایک پاکستانی درانداز کو گولی مار کر ہلاک کر دیا تھا۔ 21 اگست کو ایک اور واقعے میں ایل او سی پر فوج کے دستوں نے نوشہرہ قصبے کے سیہڑ مکری علاقے میں ایک اور درانداز کو گولی مار کر گرفتار کیا گیا تھا۔
