شام میں تیل کی تنصیبات پر میزائل حملے، چار افراد ہلاک، 24 زخمی

شمالی شام میں تیل کی تنصیبات پر میزائل حملے کیے گئے جس کے بعد وہاں زبردست آتشزدگی کی خبر ہے۔ اس حملے میں 180 سے زائد تیل ٹینکر جل کر خاک ہوگئے ہیں اور کم از کم چار افراد ہلاک اور 24 زخمی ہوئے ہیں۔

شمالی شام میں ترکی کی حمایت یافتہ اپوزیشن فورسز کے ذریعہ تیل کی تنصیبات پر میزائل حملے کیے گئے جس کی وجہ سے وہاں کے ایک بڑے علاقے میں آگ بھڑک اٹھی ہے، جہاں عام طور پر تیل سے بھرے ٹینکر کھڑے ہوتے ہیں۔

شام کی حزب اختلاف کے گروپوں اور ایک جنگی مانیٹر نے ترکی کی سرحد کے قریب جرابلس اور الباب قصبوں کے قریب کیے گئے حملے کے لیے روس کو ذمہ دار قرار دیا ہے۔

برطانیہ میں مقیم شامی آبزرویٹری برائے انسانی حقوق نے ایک رپورٹ میں کہا ہے کہ بحیرہ روم میں روسی جنگی بحری جہازوں نے تین میزائل داغے جو خطے میں قدیم آئل ریفائنریوں اور ٹینکر ٹرکوں سے ٹکرا گئے۔

اس حملے میں 180 سے زائد تیل ٹینکر جل کر خاک ہوگئے

شامی آبزرویٹری برائے انسانی حقوق نے بتایا کہ اس زبردست آتشزدگی میں 180 سے زائد تیل ٹینکر جل گئے اور کم از کم چار افراد ہلاک اور 24 زخمی ہوئے ہیں۔

روس کے جنگی جہاز سے داغے گئے میزائلوں کی تصدیق ابھی تک نہیں ہوسکی ہے۔

شامی صدر بشارالاسد کا اہم حامی روس ہے، لیکن روس نے ابھی تک ان الزامات پر کوئی تبصرہ نہیں کیا ہے۔

اس حملے میں 180 سے زائد تیل ٹینکر جل کر خاک ہوگئے

ترکی کی سرکاری انادولو خبر رساں ایجنسی نے اطلاع دی ہے کہ وہ بیلسٹک میزائل تھے، لیکن کہا کہ یہ واضح نہیں ہے کہ یہ حملے کس نے کیے ہیں۔

ترکی اور اتحادی شام کے حزب اختلاف کے جنگجو شمالی شام کے بڑے حصوں پر کنٹرول رکھتے ہیں۔