عالمی ادارہ صحت (ڈبلیو ایچ او) کے سربراہ ٹیڈروس گیبریسیوس نے کہا کہ کورونا وائرس سنگین رخ اختیار کرتا جارہا ہے، یہی وجہ ہے کہ یہ وبا عالمی سطح پر صورتحال کو مزید خراب کررہی ہے۔
انہوں نے کورونا وائرس کے پھیلاؤ پر تشویش کا اظہار کرتے ہوئے دنیا کو متنبہ کیا کہ اس سے پوری دنیا میں عدم اطمینان پیدا ہوسکتا ہے۔
جنیوا میں ایک ورچول پریس کانفرنس کے دوران عالمی ادارہ صحت کے سربراہ ٹیڈروس گیبریسیوس نے کہا کہ 'یورپ میں صورتحال بہتر ہورہی ہے لیکن عالمی سطح پر صورتحال مزید خراب ہوتی جارہی ہے'۔
ڈبلیو ایچ او کے سربراہ نے بتایا کہ گزشتہ 24 گھنٹوں کے دوران ایک لاکھ 36 ہزار سے زیادہ کیس رپورٹ ہوئے ہیں، جو ایک دن میں اب تک کا سب سے زیادہ واقعہ ہے، ان میں سے زیادہ تر کیسز امریکہ اور جنوبی ایشیاء سے آئے ہیں۔
وہیں بھارت میں بھی کورونا وائرس نے سنگین رخ اختیار کرلیا ہے، یہاں یومیہ 9 ہزار سے زائد نئے کیسز آرہے ہیں اور اب تک ڈھائی لاکھ سے زائد افراد متاثر ہیں جبکہ سات ہزار سے زائد افراد ہلاک ہوچکے ہیں۔
