فرانس کے صدر ایمیونل میکخواں نے امریکی صدر جو بائیڈن سے فون پر گفتگو کرتے ہوئے کہا کہ وہ امریکہ اور فرانس کے تعلقات کو مستحکم کرنا چاہتے ہیں اور ایک دوسرے کے ساتھ مل کر کام کرنا چاہتے ہیں۔
میکخواں کا یہ موقف اپنے امریکی ہم منصب جو بائیڈن کے ساتھ ٹیلی فون پر گفتگو کے دوران سامنے آیا۔
وائٹ ہاؤس کے مطابق، امریکی صدر نے میکخواں کے ساتھ بات چیت میں نیٹو اتحاد اور یورپی یونین کے ساتھ شراکت داری کے ذریعے دو طرفہ تعلقات کو مضبوط بنانے پر روشنی ڈالی۔ بائیڈن کے مطابق، ان کی انتظامیہ فرانس کے ساتھ تعلق مضبوط بنانے کا ارادہ رکھتی ہے۔
اس سے قبل فرانس کی جانب سے کہا گیا تھا کہ آنے والے مہینوں کے دوران ماحولیات، دنیا بھر میں کورونا ویکسین کی تقسیم اور عالمی تجارت کے حوالے سے بات چیت مرکزی اہمیت کی حامل رہے گی۔
یہ بھی پڑھیں: اسرائیل: کورونا وائرس کے پیش نظر فضائی سروس معطل
واضح رہے کہ واشنگٹن ایک بار پھر ماحولیات سے متعلق پیرس سمجھوتے اور عالمی ادارہ صحت میں شامل ہوگیا ہے۔ اس سے قبل چار برس تک سابق امریکی صدر ڈونلڈ ٹرمپ کی انتظامیہ نے سمجھوتے کا بائیکاٹ کر رکھا تھا۔
یاد رہے کہ میکخواں اور بائیڈن نے گذشتہ برس امریکی انتخابات کے چند روز بعد 10 نومبر کو ٹیلی فون پر گفتگو کی تھی۔
فرانسیسی ایوان صدارت کا کہنا ہے کہ میکخواں یورپی یونین اور امریکہ کے درمیان بہتر تعلقات کے خواہاں ہیں۔
