افغانستان اور عراق میں امریکی افواج مزید کم کرنے کا اعلان ہو سکتا ہے

افغانستان اور عراق میں امریکی افواج کا انخلا ہو رہا ہے۔ دونوں ممالک میں امریکی فوجیں طویل عرصے سے موجود ہیں، لیکن ٹرمپ کے دور اقتدار میں رفتہ رفتہ امریکی افواج کا انخلا کیا جا رہا ہے۔ اسی ضمن میں رواں ہفتے مزید افواج کے کم کرنے کا اعلان ہو سکتا ہے۔

امریکی عہدیداروں نے بتایا کہ امریکی کمانڈرز اس بات کی توقع کرتے ہیں کہ رواں ہفتے صدر ڈونلڈ ٹرمپ باضابطہ طور پر افغانستان اور عراق سے امریکی افواج کو مزید کم کرنے کا حکم صادر کر سکتے ہیں۔

سی این این کی رپورٹ کے مطابق عہدیداروں نے بتایا کہ پینٹا گون نے کمانڈرس کو ایک نوٹس جاری کیا ہے جسے 'وارننگ آرڈر' کہا گیا ہے۔ اس آرڈر کے تحت صدر ٹرمپ کے 20 جنوری 2021 کو عہدہ چھوڑنے سے قبل 15 جنوری تک افغانستان اور عراق، دونوں ممالک سے ڈھائی ڈھائی ہزار امریکی افواج کو کم کرنے کے منصوبے کی شروعات کی جائے گی۔

فی الحال تقریبا ساڑھے 4 ہزار امریکی افواج افغانستان اور تین ہزار عراق میں موجود ہیں۔

گذشتہ 7 اکتوبر کو صدر ٹرمپ نے ایک ٹوئٹ پیغام میں لکھا تھا کہ 'ہمیں افغانستان میں کام کر رہے اپنے بہادر مین اور وومین کو کرسمس تک کم سے کم کرنا چاہیے'۔