ابو ظہبی: لاک ڈاؤن میں توسیع

متحدہ عرب امارتوں میں شامل دوسرے شہروں کے افراد ابوظہبی، العین اور الظفرہ میں داخل نہیں ہوسکتے اور ابوظہبی کے شہری دوسرے کسی بھی امارتی شہروں میں نہیں جاسکتے ہیں۔

کورونا کے کیسز میں اضافہ کو دیکھتے ہوئے اور اس کے پھیلاؤ کو روکنے کے لیے متحدہ عرب امارات نے ابوظہبی میں دخول اور خروج پر عاید پابندی میں منگل کو 16 جون سے مزید ایک ہفتے کے لیے توسیع کردی ہے۔

متحدہ عرب امارات کی سرکاری خبررساں ایجنسی وام کے مطابق 'ابو ظہبی کی ہنگامی اور کرائسس کمیٹی برائے کووِڈ-19 وَبا نے پیر کو ابو ظہبی پولیس اور محکمہ صحت کے ساتھ بات چیت کے بعد امارات اور اس میں شامل علاقے العین اور الظفرہ میں لوگوں کے دخول اور خروج پر عاید پابندی میں مزید ایک ہفتے کی توسیع کا فیصلہ کیا ہے'۔

متحدہ عرب امارات کی دارالحکومت ابوظہبی میں دو جون کو کرونا وائرس کے پیش نظر نقل وحرکت پر پابندی عاید کر دی گئی تھی۔ اس میں دوسری مرتبہ توسیع کی گئی ہے۔

دریں اثناء امارات ائیرلائنز کا ایک مسافر طیارہ پیر کو دبئی سے بحرین کے بین الاقوامی ہوائی اڈے پر پہنچ گیا ہے، اس طرح دبئی اور بحرین کے درمیان پروازیں باضابطہ طور پر بحال ہوگئی ہیں۔