غزہ میں اسرائیلی فوج کی جانب سے جارحیت کا سلسلہ مسلسل جاری ہے، اے ایف پی کے صحافیوں کے مطابق اسرائیلی فضائی نے ہفتہ کے روز غزہ پٹی کی دوسری بلند ترین عمارت برج الجلاء کو نشانہ بنایا اور اسے تباہ کردیا۔
برج الجلاء عمارت میں الجزیرہ کے دفتر اور امریکی خبر رساں ادارے ایسوسی ایٹڈ پریس کے علاوہ دیگر مقامی اور بین الاقوامی نشریاتی اداروں کے دفاتر کے ساتھ کئی رہائشی اپارٹمنٹس بھی تھے۔
اس حملے کے بعد اسرائیل نے غزہ کے حکمراں عسکریت پسند حماس گروپ کے ایک اعلی رہنما کے گھر پر بھی بمباری کی اور سنیچر کو ہی ایک پناہ گزین کیمپ پر اسرائیل کے حملے میں آٹھ بچے اور دو خواتین ہلاک ہوئیں۔
الجزیرہ نے ایک ٹویٹ میں کہا "اسرائیل نے غزہ کی پٹی میں جلاء ٹاور کو تباہ کردیا ، جس میں الجزیرہ کے دفتر اور دیگر بین الاقوامی پریس دفاتر موجود ہیں۔" اے پی کے ایک صحافی کا کہنا تھا کہ فوج نے حملے سے پہلے ٹاور کے مالک کو خبردار کیا تھا۔
غیر ملکی میڈیا کے مطابق برج الجلاء عمارت کو نشانہ بنانے کی کوئی وجہ نہیں بتائی گئی۔ غزہ میں پیر سے اسرائیلی حملوں میں خواتین اور بچوں سمیت متعدد افراد ہلاک ہوگئے ہیں۔
اس مدت کے دوران حماس نے بھی سیکڑوں راکٹ اسرائیل پر فائر کیے جس میں ایک بچے سمیت سات افراد ہلاک ہوگئے۔
عرب میڈیا کے مطابق اسرائیلی فضائیہ نے برج الجلاء کو چار میزائلوں سے نشانہ بنایا گیا، اسرائیلی بمباری کے باعث عمارت زمین بوس ہوگئی۔
